Воблачна. Моцны снег. Галалёдзіца. У Беларусі абвешчаны аранжавы ўзровень небяспекі. Людзі радуюцца сапраўднай зіме, аднак камунальныя службы не даюць рады, а ратавальнікі просяць быць асцярожнымі.
Як ні дзіўна, але снег у студзені цяпер уражвае. Калі маса ападкаў накрыла краіну, камунальнікі адправіліся змагацца з тонамі снегу на дарогах і ходніках. Каб пачысціць сталіцу, выехалі больш за 620 адмысловых машынаў, аднак, на думку апытаных намі менчукоў, камунальныя службы з задачай усё ж такі не спраўляюцца:
«Не вельмі люблю нашыя камунальныя службы, бо яны выконваюць свае функцыі – ніяк».
«Трэба ўначы было чысціць (калі снег ішоў), а не цяпер, раніцай».
«Ніякіх праблемаў не бачу: я сёння ўзяў лапатку, крыху адкапаў – і паехаў далей».
«Дворнікі добра мятуць… а службы – не».
«Нават калі не спраўляюцца, мне падабаецца: няхай будзе лепш снежна».
«Нам грэх скардзіцца на камунальныя службы».
Але снег у святочны перыяд перадусім успрымаецца як падарунак прыроды. У гэтым упэўненыя жыхары Глыбокага.
«Ну, зіма сапраўдная. Вы самі бачыце! Цёпла, добра, утульна – як у нас, у Беларусі, і павінна быць».
«Хоць нешта ў жыцці людзей радаснае!»
«На лыжах можна пакатацца, на санях».
«Выдатнае: і настрой і надвор’е!»
«Па снезе засумавалі».
На жаль, снежная зіма – гэта не толькі прыгожа. Непагадзь бывае небяспечнай. Ля Камароўскага рынку ў сталіцы аўтамабіль уляцеў у падземны пераход. На шчасце, абышлося без ахвяраў.
У сувязі са снегападам сіноптыкі абвесцілі на сёння аранжавы ўзровень небяспекі. У такое надворʼе ратавальнікі рэкамендуюць быць падалей ад дрэваў і ўсяго, што можа абрынуцца пад ціскам снегу. Лепш па магчымасці ўстрымацца ад паездак па горадзе на асабістым аўтамабілі ды абыходзіць хісткія будынкі і дамы з няўстойлівым дахам.
Каця Малей, belsat.eu
