Больш за палову раёнаў Беларусі прызнаныя неспрыяльнымі для сельскай гаспадаркі да 2025 года. Адпаведны пералік апублікаваў Савет Міністраў. Прадпрыемствам аграпрамысловага комплексу рашэннем ураду будуць падвышаныя надбаўкі – адразу на 10 %.
Усяго ў Беларусі – 118 раёнаў, і 66 з іх урад прызнаў неспрыяльнымі для стварэння аграрнай прадукцыі. Найбольш – у Віцебскай і Гомельскай вобласцях, 18 і 20 раёнаў, адпаведна. Паводле чыноўнікаў, у такіх раёнах немагчыма арганізаваць высокарэнтабельную вытворчасць і жыць з таго, што дае зямля. Пінскі раён таксама прызналі неспрыяльным.
Вось што думаюць пра гэта жыхары Малоткавічаў Пінскага раёну:
«Не згодны, у нашым раёне ўсё выдатна з сельскай гаспадаркай!»
«Нармальныя ў нас землі, і людзі працавітыя».
«Землі добрыя. Але залежыць ад кіраўніцтва, хто займаецца зямлёй».
Глядзіце сюжэт у выданні «Аб’ектыву»:
Яшчэ 5 гадоў таму такіх неспрыяльных раёнаў было на 4 менш. Урадавы рэйтынг раёнаў залежыць ад прыродна-кліматычных фактараў, якасці глебы, забруджанасці радыяцыяй ды колькасці здольнага працаваць насельніцтва. Але і ў гэтых раёнах, прызнаных нерэнтабельнымі, ёсць эфектыўныя аграгаспадаркі, нагадвае эканаміст Аляксандр Ярашук:
«Садавіна-гародніна, ягады – якраз з беларускага Палесся з’яўляюцца. І ўзнікае пытанне: хто вырабляе садавіну, гародніну, ягады, клубніцы? Сяляне. У прыватным сектары».
Чаму тады Піншчына, Лунінец і нават Столінскі раён, знакаміты агуркамі, прызнаны нерэнтабельным?
«Умовы неспрыяльныя не прыродна-кліматычныя, а палітычныя і эканамічныя. Бо яны вынікаюць з палітычнай сістэмы, якая створаная ў краіне, якая не хоча прызнаваць за паўнавартасную прыватную ўласнасць», – мяркуе Ярашук.
Кіраўніцтва краіны дае права на самастойнае развіццё толькі зусім занядбаным калгасам, не здольным пражыць нават з бюджэтнымі датацыямі ды ільготнымі крэдытамі. Вось што загадаў Лукашэнка на адмысловым паседжанні, прысвечаным развіццю сельскай гаспадаркі Віцебшчыны:
«Трэба ўвесці прыватызацыю гэтых гаспадарак. Не хочуць працаваць у такой форме, трэба адкрыць прыватызацыю. Спіс складзіце і на сайце вывесіце. Можа, прыйдзе нейкі інвестар і дасць нейкую капейку».
Іншыя калгасы Лукашэнка загадаў захаваць. А Нацбанку – прымусіць усе банкі надаваць шэфскую дапамогу калгасам, а то, цытата, «жырует жульё».
«Нацбанк меў 10 калгасаў падшэфных у часы Пятра Пракаповіча», – нагадвае Аляксандр Ярашук.
Як паведаміў сённяшні старшыня Нацбанку Павел Калаур, пасля паседжання ў кіраўніка дзяржавы ў Віцебскай вобласці будуць ствараць аграхолдынг на базе Пастаўскага малочнага заводу. Апроч сельскагаспадарчых прадпрыемстваў у праекце будуць удзельнічаць 5–6 банкаў, дзяржаўныя страхавыя кампаніі ды мясцовыя ўлады. Так што тут дзяржава будзе кіраваць аграрыямі яшчэ мацней.
Яраслаў Сцешык belsat.eu