Аб'ектыў 11.02.2017 Талака для сляпога паэта


Быць відушчымі да чужое нястачы. Неабыякавыя людзі сабралі сродкі і рэчы для сляпога паэта Алеся Чобата. Збор распачаўся з ініцыятывы журналіста «Белсату» Змітра Ягорава. А напярэдадні падарункі перадалі адрасату. Як не застацца ў баку да чужое бяды – у нашым рэпартажы.

Посуд, адзенне, абутак, коўдры ды ежу – рэчы першай неабходнасці – сабралі валанцёры і напярэдадні прывезлі ў Скідзель, каб перадаць невідушчаму паэту Алесю Чобату.

«Цяпер я сляпы чалавек і «жыву ў цемры», як пісаў мой прыяцель Чэслаў Мілаш, якога я перакладаю. І я прашу: адно не мне аднаму дапамагайце, дзяліцеся», – кажа Алесь Чобат.

Спадар Алесь жыве ў самоце і не можа разлічваць нават на суседзяў, бо як страціў зрок, менавіта мясцовыя вынеслі з ягонай хаты ўсё, што можна было вынесці.


Дзякуючы ініцыятыве журналіста «Белсату» Змітра Ягорава, талакою атрымалася сабраць грошы ды набыць некаторыя рэчы.

«Людзі мілыя, мне цяжка гаварыць больш, таму я перастаю. Прабачце мяне і дзякую», – кажа ўражаны паэт.

Не зважаючы на тое, што пасля аперацыі ў 2013-ым годзе паэт канчаткова страціў зрок, ён не перастае пісаць. Ягоныя творы пад дыктоўку запісвае паэтка Данута Бічэль, ледзь не адзіны чалавек, які наведвае спадара Чобата і часам ладзіць з ім творчыя сустрэчы. Сам творца жыве і працуе ў стогадовай хаце, у варунках, якія складана назваць годнымі.

«Хата старая. Усё валіцца трэба нешта рабіць, хутчэй, пільнае. Тое што ў аварыйным стане знаходзіцца: можа ганак, дах у нейкіх месцах, штосьці ўнутры – лёгкая адзелка», – адзначае валанцёр Юрый Седзянеўскі.

Увесну гарадзенскія актывісты збіраюцца зарганізаваць яшчэ адну талаку, каб супольнымі сіламі адрамантаваць хату паэта. Да дапамогі Алесю Чобату можа далучыцца кожны ахвочы.

Наста Ільіна, belsat.eu

Глядзі таксама
Каментары