Аніякае свабоды для інфляцыі! Узяць на ўзмоцнены кантроль сітуацыю з коштамі загадаў прэм’ер-міністр краіны Сяргей Румас. Задача ўраду – укласціся ў гадавы план, а да падвядзення вынікаў года застаецца два месяцы.
Вяртаешся з крамы з закупамі – у запланаваны бюджэт не ўклаўся. Жыхары Менску распавядаюць:
«Непрыемна. Даводзіцца больш выдаткоўваць, безумоўна больш на харчы, на мяса і г.д.».
«Для пенсіянераў гэта вельмі рэзкае вялікае падаражэнне».
«Інфляцыя, кажуць, 0,8%, а кошты растуць – дай божа! І на лекі, і на ўсё»!
Жыхарка Менску казала пра вераснёўскі паказнік інфляцыі, які апынуўся найвышэйшым сярод краінаў СНД і Еўразвязу. Прэм’ер-міністр Беларусі Сяргей Румас зазначыў, што сёлета па выніках дзевяці месяцаў рост коштаў застаецца ў прагназаваных межах (3,7% з 4,3%). Але загадаў яго кантраляваць:
«Прашу міністра антыманапольнага рэгулявання і гандлю, усіх кіраўнікоў узяць на ўзмоцнены кантроль сітуацыю з коштамі».
У гадавы прагноз Нацбанку і МВФ урад укладзецца, калі ў апошнія тры месяцы інфляцыя не перакрочыць адной цэлай васьмі дзясятых адсотка. Ці ёсць падставы для непакою?
«Для Нацыянальнага Банку, які напісаў у сваёй стратэгіі, што трэба каб было тагітаванне інфляцыі, гэта безумоўна дрэннае развіццё сітуацыі, бо гэта тое, ад чаго Нацбанк намагаўся адысці», – тлумачыць эканаміст Яраслаў Раманчук.
Умяшанне ўраду ў справы Галоўнага банку ніколі не спрыяла развіццю эканомікі рынкавай. Бо рабілася дзеля захавання эканомікі планавай. Вядома, што сёння адну гайку мацней закруці, заўтра – напругі не вытрымае іншая. Насельніцтва, аднак, прызвычаілася да рэгулявання коштаў на народныя тавары. Эканаміст Яраслаў Раманчук каментуе:
«Можна таксама рабіць імітацыю. Можна штучна змяняць кошык тых тавараў і паслугаў, паводле якіх лічыцца інфляцыя, імітуючы стабільнасць цэнаў».
Таму эксперты нярэдка адзначалі вялікую розніцу паміж афіцыйным і рэальным ростам коштаў. Налета планку гадавога росту афіцыйнага паказніка інфляцыі хочуць знізіць да пяці адсоткаў. Калі Палата Прадстаўнікоў ухваліць новую Праграму дзейнасці ўраду да 2020-га года. Але гэтае ўхваленне хутчэй фармальнасць.
Юлія Цяльпук, belsat.eu
Фота: ITAR-TASS / Valery Sharifulin / FORUM
