Усеагульнага каранціну ўрад не ўвёў, але загадаў ізаляваць хворых і тых, хто з імі кантактаваў. Што можна, а чаго нельга рабіць падчас самаізаляцыі? Як два тыдні не хадзіць на працу, і ці можна ўвогуле выбірацца з дому?
Усім, хто захварэў ці мае падазрэнне на Ковід-19, – сядзець дома пад пагрозаю штрафаў. У сувязі з эпідэміяй урад Беларусі ўвёў абмежавальную захаду – самаізаляцыю.
Адмысловы бланк грамадзянам пад роспіс будуць уручаць медыкі. Загад самаізалявацца атрымаюць тыя, у каго пацвердзілі інфекцыю COVID-19; тыя, хто непасрэдна кантактаваў з хворымі; тыя, хто кантактаваў з іхным асяроддзем або вярнуўся з краінаў, дзе назіраюцца захворванні, – гэта значыць, з любой краіны свету.
Самаізаляцыя прадугледжаная на 14 дзён і можа быць працягнутая на загад медыкаў. На гэты час ізаляваныя атрымаюць бальнічны і звязаныя з ім выплаты. Ці гатовыя нашыя суайчыннікі замкнуцца ў хатах на два тыдні, каб збіць хвалю захворванняў? Вось што кажуць жыхары Пінску:
«Калі б перавялі на дыстанцыйнае навучанне, было б можна. А так – пакуль не».
«Абавязкова пайду, таму, што я цаню сваё здароўе, а таксама здароўе сваіх родных і блізкіх».
«Буду прытрымлівацца таго, што параяць медычныя працаўнікі. Сто адсоткаў – вытрымаю!»
«Адзін тыдзень – так, а вось два – гэта пад пытаннем».
Парушальнікам самаізаляцыі пагражаюць штрафы да пяцісот долараў або арышт. Агульнанацыянальныя абмежаванні Беларусь увяла апошняя ў Еўропе – нават пазней за Швецыю.
«Літва, Латвія – то там у апошнія 4–5 дзён колькасць захворванняў на каронавірус павялічваецца ўсяго на некалькі адсоткаў. Гэта 3–5 адсоткаў. У Польшчы крыху вышэй – каля 10 адсоткаў. У Расеі ды Украіне – на 14–16 %. Але нідзе, як у Беларусі, няма павелічэння на 20 адсоткаў ці, як у апошні дзень, – на цэлых 40», – каментуе дырэктар даследчага цэнтру «EAST»Андрэй Елісееў.
Паводле Міністэрства аховы здароўя, у Беларусі цяпер 1331 хворы на COVID-19. Мэты кожнага каранціну – калі не згасіць хваробу, то хаця б зменшыць хуткасць яе распаўсюджвання, каб лік хворых не перавысіў магчымасцяў медыкаў. Тым, хто застаецца ў самаізаляцыі, хадзіць на працу, вучобу ці ў спартзалу – забаронена. З кватэры можна выйсці ў трох выпадках: каб схадзіць у бліжэйшую краму, у аптэку ці вынесці смецце. Пакідаючы жытло, трэба абавязкова надзець маску.
Калі вы пачуецеся дрэнна – тэлефануйце ў хуткую ці вышліце SMS, але абавязкова папярэдзьце медыкаў, што вы ў самаізаляцыі. Ці магчыма выседзець у чатырох сценах, і што рабіць дома два тыдні?
«Запасы прадуктаў ёсць. Вытрымаць – вытрымаем!»
«Дома жанчыне заняцца заўсёды ёсць чым: прыбіранне, пранне, гатаванне».
«У мяне прысядзібны ўчастак і электроніка, якую я люблю».
«Самаразвіваўся б як-небудзь: займаўся б спортам, кнігі б чытаў».
«Я і так сяджу дома – і нічога», – каментуюць жыхары Пінску.
Захады сацыяльнага дыстанцыявання ўвялі і ў Палаце прадстаўнікоў. Дэпутатаў рассадзілі на бяспечнай адлегласці.
Аляксандр Папко, «Белсат»
