Сёння адбыўся вобшук у Ганны Валадашчук, галоўнай рэдактаркі недзяржаўнай «Газеты Слонімскай».
Яна праходзіць сведкай у крымінальнай справе за абразу работніцы сістэмы адукацыі, але Ганна адмаўляе дачыненне да паклёпніцкіх паведамленняў у мясцовых тэлеграм-каналах. Пасля з ператрусам прыехалі і ў саму рэдакцыю «Газеты Слонімскай» ды забралі камп’ютары.
А напярэдадні міліцыянты затрымалі і нашых калегаў, якія не ўдзельнічалі ў маршы пратэсту, а выконвалі сваю журналісцкую працу.
Падчас нядзельных пратэстаў затрымалі восем журналістаў. За кратамі застаецца журналіст БелаПАН Ян Аўсеюшкін, а таксама нашыя калегі, фрылансеры Яўген Шапчыц і Арцём Лява, якіх сёння перавезлі ў жодзінскі следчы ізалятар.
«Калі мы ведаем, што нашыя журналісты трапілі ў бяду, што яны арыштаваныя, то мы стараемся ўсяляк з дапамогай праваабаронцаў, валанцёраў, сваймі сіламі ім дапамагчы. Нават даходзіць да таго, што мы маем свае пакеты з перадачкамі, якія перадаем у ізалятары альбо ў пастарункі. Таксама мы ўсяляк дапамагаем, што датычыць нейкіх юрыдычных кансультацый», – распавядае адказны за кадры на «Белсаце» Зміцер Ягораў.
Дадае, што за апошні месяц журналісты «Белсату» агулам адбылі 50 содняў арышту.
Учора пасля дзесяцідзённага арышту з пінскага ізалятару выйшаў журналіст «Белсату» Віктар Ярашук. Ён распавёў, што да арыштаваных за ўдзел у несанкцыянаваным мерапрыемстве ставіліся больш жорсткае, чымся да іншых вязняў.
«Самае галоўнае – гэта, канечне, маральны ціск: 5 чалавек на 13 квадратных метрах. Нават пахадзіць па камеры немагчыма, калі ўсе стаяць. Так нельга да людзей ставіцца. Не толькі да палітычных, увогуле да людзей, якія там знаходзяцца», – падзяліўся журналіст «Белсату» Віктар Ярашук.
Таксама ўчора на волю выйшаў журналіст парталу «Магілёўскі раён» Уладзімір Лапцэвіч, якога арыштавалі ў пятніцу, каб даседзеў двое содняў. Іх журналіст мусіў адбыць ў жніўні за нібыта непадпарадкаванне службовай асобе.
«Я сядзеў незаконна, несправядліва. Што мяне зараз пасадзілі… Я ўвогуле меркаваў, што зараз мяне зноў за нешта пасадзяць. Я не выключаю, што праз нейкі час я ізноў тут апынуся», – распавядае журналіст парталу 6tv.by Уладзімір Лапцэвіч.
Цяпер за кратамі застаюцца 16 журналістаў. Пасля 9-га жніўня нашых калегаў затрымлівалі больш за 300 разоў.
Дзіяна Раткевіч, «Белсат».
