Аб'ектыў 22.03.2019 Рассельгаснагляд забараніў пастаўкі праз Беларусь турэцкіх яблыкаў


Гандлёвыя войны працягваюцца. Гэтым разам пад забарону «Рассельгаснагляду» трапілі турэцкія яблыкі, якія Беларусь рээкспартуе ў Расею. Маўляў, за турэцкі тавар Беларусь выдае садавіну іншага паходжання, якой Крэмль не вітае. Але ці толькі санкцыйная прадукцыя сталася яблыкам разладу?

У сваім паведамленні пра забарону рээкспарту турэцкіх яблыкаў праз Беларусь «Рассельгаснагляд» заяўляе, што неаднаразова паведамляў беларускім калегам пра неабходнасць больш дасканалай праверкі паходжання прадуктаў, якія размытнёўваюцца ў Беларусі ды пастаўляюцца ў Расею.

«Прынцыпова для Расеі, што Беларусь не дапамагае ў гэтым супрацьстаянні з Захадам, а сама шукае, як на гэтым зарабіць. Вось гэта больш за ўсё не падабаецца кіраўніцтву Расеі, што так бы мовіць, на бедах Расеі Беларусь імкнецца зарабіць. А не мільёны, якія яна атрымлівае, бо грошы ж невялікія», – кажа эканаміст Леанід Злотнікаў.

Санкцыйная прадукцыя трапляе на расейскі рынак паводле фальшывых сертыфікатаў з краінаў, імпарт з якіх у Расею не забаронены. Гэтак, на прасторах суседняй краіны быў вал і малдаўскіх яблыкаў і ігрушаў з краінаў Афрыкі, дзе яны наагул не растуць. А ў 2015 годзе Беларусь паставіла ў Расею яблыкаў у пяць разоў больш, чым склаў ураджай.

Станіслаў Івашкевіч, эканамічны аглядальнік «Белсату», тлумачыць:

«Рассельгаснагляд» затрымлівае толькі долю адсотку ад рээкспартаванай садавіны і гародніны. Не ад усёй садавіны і гародніны, што ідзе з Беларусі легальна і нелегальна, а толькі рээкспартаванай долю адсотку. Таму ўзнікаюць вялікія падазрэнні, што чыноўнікі «Рассельгаснагляду» самі ў карупцыйнай схеме».

Летась Беларусь імпартавала каля 200 тысячаў тонаў яблыкаў на больш за 100 мільёнаў долараў. Гэта на 60 % менш, чым у 2017 годзе, бо ў нас таксама яблыкі надта добра ўрадзілі. І нават пры гэтым ажно 40 % украінскіх яблыкаў летась экспартавалася менавіта ў Беларусь. Забарона на пастаўкі садавіны ў Расею будзе азначаць страту крыніцы паступлення валюты ў бюджэт, хоць і не надта істотную.

«У доўгатэрміновай перспектыве, аднак, гэта добра для Беларусі. Бо кантрабанда шкодзіць айчынным вытворцам тых жа яблыкаў, бо яблыкі ёсць таксама і ў нас. Айчынным перапрацоўнікам, якія маглі б карыстацца тымі ж расейскімі санкцыямі для таго, каб наладзіць заводы для выпуску сокаў. Але гэта нікому не выгадна, бо нашмат выгадней купіць за капейкі фальшывы сертыфікат і прыгнаць яго ў Расею», – гаворыць Станіслаў Івашкевіч.

Паводле падобнага прынцыпу дзеюць і іншыя галіны айчыннай эканомікі, чапляючыся за расейскі рынак, куды ідзе больш за траціну ўсяго беларускага экспарту. Леанід Злотнікаў, эканаміст:

«Нашая прамысловасць працягвае адставаць. За шмат гадоў тут нічога не з’явілася, ніякіх новых тавараў не вырабляецца… Эфектыўных прадпрыемстваў вельмі мала – 30–40 %. І такая адсталасць… Тут нічога змяніць нельга, карэнным чынам не змяняючы эканамічную сістэму».

Аднак кіраўнік дзяржавы пакуль публічна заяўляе, што ад абранага эканамічнага курсу адмаўляцца не збіраецца.

Зміцер Міцкевіч, belsat.eu

Глядзі таксама
Каментары