Раскошны бізнес-клас азербайджанскіх авіялініяў… найлепшыя гатэлі Баку… нятанная прыемнасць. Але калі вы – дэпутат Парламенцкай асамблеі Рады Еўропы, то ўлады Азербайджану знойдуць спосаб, як аплаціць вам такі ваяж. А, каб візіт быў сапраўды незабыўны, яшчэ і залатых упрыгажэнняў падораць або шыкоўны ўсходні дыван. Шчодрасцю афіцыйнага Баку кожны год могуць скарыстацца да 60-ці прадстаўнікоў Асамблеі. Толькі вось за што ж еўрапейскія дэпутаты атрымліваюць гэты «бясплатны» сыр?
«У краіне шмат палітычных зняволеных: палітыкаў, журналістаў, блогераў. Падкупаючы еўрапейскіх палітыкаў азербайджанскія ўлады хочуць адвесці праблему правоў чалавека на другі план», – кажа Мубарыз Рахімілі, журналіст з Азербайджану.
Журналісцкі цэнтр даследавання карупцыі і зарганізаванай злачыннасці высветліў, што для стварэння рэзерву «свабодных» сродкаў на такую «дыпламатычную» ў двукоссі дзейнасць улады Азербайджану выкарыстоўвалі фіктыўныя кампаніі ў Вялікай Брытаніі, праз якія было адмыта амаль $ 3 млрд. Грошы паступалі наўпрост з дзяржаўнага Міжнароднага Банку Азербайджану ў эстонскі філіял аднаго з дацкіх банкаў. Там яны раствараліся на рахунках шэрагу брытанскіх фірмаў.
У 2013 годзе адна з азербайджанскіх брытанскіх кампаніяў – «Полукс Мэнэджмент» выплаціла Eur 61 тыс на рахунак нямецкага палітыка Эдварда Лінтнера. За два тыдні да грашовага пераводу былы дэпутат Бундэстагу ўзначальваў камісію назіральнікаў ад Нямеччыны на прэзідэнцкіх выбарах у Азербайджане. Выбары яму спадабаліся
Другім уплывовым еўрапейскім пратэжэ Азербайджану аказаўся італьянскі палітык Люка Валёнтэ. Яму фіктыўныя фірмы пералічылі Eur 2,4 млн. Палітык актыўна супрацьдзеяў прыняццю рэзалюцыі ПАРЕ пра палітвязняў у Азербайджане. Як вынік, рэзалюцыя не прайшла, але самім Валёнтэ занялася міланская пракуратура. І гэта толькі вядомыя прэсе выпадкі.
Зрэшты, «чорны фонд» Азербайджану выкарыстоўвалі не толькі для подкупу еўрапейскіх палітыкаў. Журналісты з цэнтру расследаванняў здабылі факты таго, што грошы ішлі і ў кішэню першага віцэ-прэмʼера Азербайджану, ягоных сыноў ды іншых азербайджанскіх чыноўнікаў.
Ігар Кулей,«Белсат», фота: Mateusz Wlodarczyk / Forum