Аб'ектыў 24.06.2018 Парад можа каштаваць 2,5 млн долараў


Магчымую цану параду для падаткаплатнікаў апублікавала выданне Naviny.by. Сапраўдны кошт імпрэзы ўлады замоўчваюць.

Некалькі разоў на год вуліцы беларускай сталіцы накрывае грукат вайсковай тэхнікі – падчас параду або адной з яго рэпетыцыяў.

Улады бачаць у традыцыйным дзействе відовішчнасць ды «эмацыйна-патрыятычны ўздым», менчукі – разбіты асфальт, шум ды транспартавыя калапсы.

Танкам – самае месца ў двухмільённым горадзе, кажуць эксперты вайсковай газеты «Во славу Родины». Маўляў, насамрэч асфальт танкаў не баіцца, а тыя, хто думае інакш – замоўленыя ды праплочаныя. Пры гэтым кошт параду сціпла замоўчваецца. Гаворка можа ісці пра амаль два з паловаю мільёны долараў.

«Не проста там, ведаеце, дзве машыны паставілі, пракацілі і ўсё. Я прасіў паказаць моц арміі, каб людзі паглядзелі і зрабілі для сябе высновы, што там нешта ёсць, што можа іх абараніць», – заяўляў Лукашэнка.

Пачуццё ж абароненасці ў людзей выклікае не паказное бразганне зброяй, а павага дзяржавы да чалавека, захаванне і развіццё прамысловасці, эканомікі ды культуры.

Сёлета 3 ліпеня парадам пройдуць каля 4000 вайскоўцаў ды больш за 260 адзінак баявой ды не толькі тэхнікі. Сёлетняя асаблівасць – удзел жанчын, кадэтаў і кітайскіх вайскоўцаў, а таксама дэманстрацыя высокатэхналагічнага рабатызаванага комплексу. А вось ці чакаць купальняў, унітазаў і тушонкі, як летась, арганізатары імпрэзы пакуль не ўдакладняюць.

Сцяпан Святлоў; фота – Ірына Арахоўская/«Белсат»

Глядзі таксама
Каментары