Звалка памерам амаль у гектар утварылася на тэрыторыі Гомельскай прамысловай зоны. Аб’ект не агароджаны – па сутнасці туды можа трапіць любы ахвотны, і пры гэтым падвергнуць сваё жыццё небяспецы. У чым жа ўласна небяспека гіганцкага сметніка?
Гомельская прамзона – закінутая чыгунка, будынкі, якія таксама робяць уражанне закінутых. Але, як высветлілася, тут месціцца прадпрыемства, якое працуе дагэтуль – Гомельскі будаўнічы трэст № 14. З боку чыгункі трапіць на яго тэрыторыю можна без перашкодаў.
«А тут што хачу, тое высыпаю, чаго яны сюды вось не прыйдуць і не ўсунуць таму паперку. Няма ўласніка? Дык знайдзіце, там будынак, там будынак. Дык ідзіце шукайце, дроны шукаюць, і гэта могуць знайсці», – кажа грамадскі актывіст з Гомля Барыс Анікееў.
Бітая цэгла, часткі арматуры, аскепкі шкла, застылы бетон, кавалкі асфальту, пасудзіны ад хімічных рэчываў, бляшанкі ад фарбы.
І відавочна, што гэтае смецце ляжыць тут далёка не першы месяц. Працаўнікі будтрэсту сцвердзілі, што сметнішча прадпрыемству не належыць.
Але кіраўніцтва ад смецця не адмаўляецца. Што праўда, запэўнівае, што гэта не сметнішча, а проста смецце ляжыць і чакае, пакуль яго адсартуюць.
«Каб не здаваць і адразу сартаваць, гэта ўсё сюды, мы ўзялі дзесьці 0,88 гектара і сартуюць, гэта ж другасны рэсурс ідзе, каб не мэтанакіравана, а ўсё гэта сартуюць. – Гэта ў вас не сметнішча, гэта ў вас сартавальны пункт? – Так, так», – кажа Мікалай Галкін, намеснік дырэктара ў прамысловай бяспецы БУ-165 Будтрэсту №14.
Але ці мае прадпрыемства дазвол на часовае захоўванне смецця? Сярод адкідаў могуць быць рэчывы, небяспечныя не толькі для прыроды, але і для здароўя і жыцця чалавека, кажуць эколагі.
«Адна справа, для чаго гэта выкарыстоўваецца, як яны кажуць часовая звалка, часовае месца знаходжання ў рамках наступнага сартавання і г.д., гэта адна справа, дзіўна што гэта не агароджана. Кожны можа палічыць, што там ёсць нешта каштоўнае, і сабе гэта забраць, а гэта каштоўнае можа быць небяспечным насамрэч і потым можа быць распаўсюджванне небяспечных нейкіх прадметаў», – заяўляе юрыст «Экадому» Рыгор Фёдараў.
Але відавочна, што пра наступствы ніхто не клапоціцца.
Міхась Слаўнікаў; фота – Yuri Smityuk/TASS/Forum
