Невідучая беларуска адкрыла прыбытковую СПА-студыю


Вольга Палашавец пачала губляць зрок пасля пнеўманіі, перанесенай у дзяцінстве. Канчаткова жанчына перастала бачыць пасля нараджэння другога дзіцяці. Але інваліднасць не замінае ёй больш за 20 гадоў займацца бізнесам.

У Вольгі доўгі час была ўласная турыстычная фірма. Але пасля нараджэння трэцяга дзіцяці яна зразумела, што хоча мець такі бізнес, дзе здолее рэалізоўвацца напоўніцу. І выключна за свае грошы, без аніякіх грантаў і субсідыяў, яна адкрыла спа-студыю «Алтэя».

«Штодзённая праца, каб прываблівалася плынь кліентаў, каб пашыраўся спектр працэдураў на рынку, каб мы займалі прыстойную нішу на сёння. І працы было зроблена вельмі шмат і мной, і калектывам, з якім я працую», – дзеліцца сакрэтамі поспеху Вольга.

Глядзіце сюжэт у выданні «Аб’ектыву»:

Вольга не пазіцыянуе сваёй студыі як інклюзіўнай, хоць там працуюць у тым ліку і людзі з інваліднасцю. Бярэ іх на працу выключна за прафесійныя якасці.

«Маёй увагі гэта аніяк не адцягвае. Калі чалавек – прафесіянал, то гэта яму аніяк не перашкодзіць. Я прыходжу сюды і атрымліваю ўсё, што хачу: масаж і добры сэрвіс», – кажа Аляксандра Драздова, пастаянная кліентка студыі.

Тэхналагічны прагрэс зрабіў вядзенне бізнесу для людзей з парушэннямі зроку значна прасцейшым. З’явіліся галасавыя праграмы, якія дапамагаюць прачытаць важны дакумент ці напісаць паведамленне. Вашымі вачыма становіцца голас.

Міхась Антоненка з Беларускага таварыства інвалідаў зроку кажа, што калі тыя ж смартфоны, фільмы, кнігі ды нават шыльды робяцца даступнымі для невідушчых, то з тым жа грамадскім транспартам – вялікія праблемы.

«Вельмі клапотная справа – знайсці нумар свайго аўтобуса ці тралейбуса, сесці ў яго і даехаць да таго прыпынку, які табе патрэбны», – наракае ён.

Паводле Міхася, добрыя зрухі для людзей з парушэннямі зроку ёсць. Гэтак, сёлета Міністэрства адукацыі пачало навучаць невідушчых людзей IT-спецыяльнасцям.

Ксенія Тарасевіч belsat.eu