Раней на імпрэзе было толькі пра дзяржаўныя і камерцыйныя медыі, цяпер – гэтаксама і пра незалежную журналістыку.
Упершыню на штогадовай выставе «СМІ ў Беларусі» сёлета бярэ ўдзел Беларуская асацыяцыя журналістаў.
«Звычайна на выставе гучаць пахвальныя нейкія водгукі, усе расказваюць, як усе добра ў медыясферы, якое ў нас добрае заканадаўства, як добра распаўсюджваць выданні. У гэтым годзе мы ўдзельнічаем дзеля таго, каб расказаць, што не ўсе так добра», – кажа намеснік старшыні БАЖ Барыс Гарэцкі.
А распавесці ёсць пра што: паводле міжнароднай арганізацыі «Рэпарцёры без межаў», Беларусь займае 153-е месца са 180-ці у індэксе свабоды прэсы. Паміж Брунеем і Конга.
«Сітуацыя са свабодай прэсы ў Беларусі адрозніваецца ад суседніх краінаў вельмі высокай ступенню дзяржаўнага кантролю над медыямі, і гэты кантроль распаўсюджваецца, мы бачым, і на інтэрнэт-СМІ зараз», – кажа старшыня арганізацыі Андрэй Бастунец.
«Калі раней мы больш баяліся фізічнага гвалту, то цяпер тыя журналісты, якія працуюць на незалежныя медыя, якія вядуць вяшчанне з-за мяжы, такія, як «Белсат», больш сутыкаюцца са штрафамі», – кажа медыяэксперт Паўлюк Быкоўскі.
Сёлета нашых журналістаў аштрафавалі на Br 32 768. Нягледзячы на прыгожыя словы прадстаўнікоў уладаў.
Выстава «СМІ ў Беларусі» працягнецца да 4-га траўня. Уваход вольны для ўсіх ахвотных.
Ян Вярбіцкі, «Белсат»