Мастацкія вырабы і сувеніры з «Пагоняю»! Незвычайны кірмаш у віцебскім касцёле
Усе тавары на ім – зробленыя дзецьмі. Прычым займацца добраю справай іх ніхто не прымушаў!
Паштоўкі, мастацкія вырабы ды нават сувеніры з «Пагоняю»! Увесь асартымент на кірмашы ў касцёле святога Антонія Падуанскага ў Віцебску выраблены мастакамі-дзецьмі ды пенсіянерамі.
Наведніцы кірмашу:
«Дзякуй, што ў нас такія цяпер праводзіцца ў касцёле перад калядамі акцыі. Можна набыць вось такія цікавыя вырабы. Так, Ліза?».
«І вось гэтым, я думаю, дзеці славяць Бога. Сваёй працай, сваймі намаганнямі яны славяць Бога».
Вялікая частка маленькіх мастакоў – з праваслаўных ці нерэлігійных сем’яў. Тут пераважае іншая ідэя – ідэя абʼяднання дзеля добрае справы.
«Часамі ўдома чакаем-чакаем – няма дзяўчынкі. Што рабіла? Ну, там з сястрой Мажэнаю мы такія робім…», – тлумачаць Вольга і Ліза Корбут.
Сястра Мажэна, якая апякуецца дзецьмі, кажа, што галоўнае ў справе – сабраць усіх разам.
«Каб яны былі ўцягнутыя ў нейкае дзеянне, якое дасць ім магчымасць развіцця, правядзення часу. Улічваючы і элемент працы. Бо ў гэтым ёсць і праца – уседлівасць, уключэнне таленту, здольнасці дзіцяці», – распавядае сястра Мажэна з касцёла Святога Антонія Падуанскага.
Заробленае на кірмашы перадаюць на карысць гэтай невялікай супольнасці. Тэнісны і футбольны стол, забаўкі і пачастункі – падзяка дзецям за працу. А бацькі дзякуюць касцёлу і сястры Мажэне, сярод іншага.
«Я вельмі задаволены, што маё дзіця пад асаблівым прыглядам – не блытаецца дзесьці па вуліцах або падʼездах, а займаецца добраю справай», – кажа адзін з бацькоў.
Касцёлам святога Антонія раней называлася святыня, што калісьці стаяла ў гістарычным цэнтры гораду. Яе знішчылі камуністычныя ўлады пяцьдзясят сем гадоў таму. Цяпер касцёл плануюць аднавіць. А гэта значыць, што добрых справаў будзе толькі болець.
Сцяпан Святлоў, «Белсат»
