Вераніка Яновіч дзяжурыць ля суда Фрунзенскага раёну сталіцы, чакаючы працэсу над затрыманым сябрам Мікітам. Учора хлопца схапілі ля станцыі метро «Спартыўная», якраз ля сценаў гэтага будынку.
«Мы патэлефанавалі ў 102. Нам адказалі, што інфармацыя будзе толькі а 9-й раніцы заўтра. А пасля падумалі, калі яго тут затрымалі, то хутчэй за ўсё будзе ў Фрунзенскім РУУС ён знаходзіцца. Спісаў яны таксама не далі. І мы пад’язджалі, і валанцёры сказалі, што рэчы яны таксама не прымалі. А ён быў у адной байцы, ляжаў на зямлі, і, мабыць, мокрая вопратка яго», – кажа сяброўка затрыманага Вераніка Яновіч.
На відэа, якое зрабілі відавочцы затрымання, бачна, што Мікіта не супраціўляецца. Нягледзячы на гэта суддзя Андрэй Млечка пакараў хлопца дваццацідзённым арыштам за ўдзел у несанкцыянаваным мерапрыемстве і непадпарадкаванне супрацоўнікам міліцыі.
«Пасля ўсіх гэтых акцый, асабліва ў нядзелю, людзям звычайна даюць содні. Я не ведаю, куды яшчэ можна пасадзіць людзей зараз. Бо здаецца, усе турмы, усе ЦІПы, ІЧУ мясцовыя напоўненыя людзьмі. І куды яшчэ…», – зазначае дзяўчына.
Учора ж, паводле праваабарончага цэнтру «Вясна», затрымалі трохсот дзевяноста чалавек, у тым ліку вядомага актора і музыку Іллю Чарапко-Самахвалава ды Ігара Аўсяніка, аднаго з дырэктараў «EPAM». Хаця ў аўтазакі магло трапіць і болей людзей.
Цэнтральныя вуліцы Менску ўпершыню за тры з паловаю месяцы пратэсту былі пустымі і ціхімі. Уся актыўнасць перанеслася ў спальныя раёны, менавіта тут прайшлі тысячныя маршы. Гэткі новы фармат выбралі самыя людзі.
Галасаванне за новы фармат пратэсту адбывалася на платформе «Голас», у ім узялі ўдзел 240 тысяч чалавек. Большасць абрала марш праз раёны, пра што заявіў напярэдадні сябра прэзідыуму Каардынацыйнае рады Павел Латушка:
«Хто не можа далучыцца да асноўных, доўгіх маршаў, можа выйсці падтрымаць суседзяў у двары. А ў выпадку нападзення слабавікоў, вы, ведаючы свой двор і ведаючы сваіх суседзяў, зможаце схавацца лепей, чым у незнаёмай частцы гораду».
Відавочна, сыход дэманстрантаў з цэнтру гораду на ўскраіны дазволіў пазбегчы масавых затрыманняў, якімі заканчваліся папярэднія маршы. Змяніліся і паводзіны людзей: цяпер яны не ўцякаюць ад АМАПу, а прымушаюць адступаць сілавікоў. Лідарка апазіцыі Святлана Ціханоўская назвала Марш супраць фашызму – поспехам народу.
«Мы таксама ведаем: сёння рэжым не здолеў перашкодзіць народу выйсці на вуліцу. Сёння кожны пераканаўся, што гэта нашыя раёны, нашыя гарады і нашая Беларусь. І канчаткова яе вызваліць можам толькі мы», – падкрэсліла Святлана Ціханоўская.
Сёння ж стала вядома пра разгляд скаргаў на прысуды Вольгі Хіжынковай у судах Заводскага і Цэнтральнага раёнаў Менску. Міс Беларусь – 2008 затрымалі 8 лістапада і арыштавалі спачатку на 12 содняў, а пасля яшчэ на 15. Дзяўчына застаецца за кратамі.
Хрысціна Чарняўская, «Белсат»
