Аб'ектыў 13.08.2018 Лукашэнка змусіць беларусаў глядзець прапаганду


Пакуль працаўнікі дзвюх найбуйнейшых медыякампаніяў застаюцца пад крымінальнымі справамі, паралельна ўлады рыхтуюць шэраг заканадаўчых новаўвядзенняў, каб упарадкаваць інфармацыйнае поле Беларусі. Міністр інфармацыі Аляксандр Карлюкевіч заявіў, што неўзабаве нармалізуюць і гэтак званы нацыянальны тэлевізійны кантэнт.

Будынак у цэнтры гораду, дзясяткі медыяў, сотні мільёнаў долараў з бюджэту. Але ці маюць яны аўдыторыю?

Жыхары Менску:

«Аднабокасць. Па сутнасці аднабокая пазіцыя».

«Навіны я чытаю ў інтэрнэце, бо па беларускім ТБ яны не заўсёды праўдзівыя».

«І здаецца, гаворым на адной і той жа мове, але так непісьменна. Проста жах. Таму я аддаю перавагу Расеі».

Міністэрства інфармацыі рыхтуе праект пастановы аб нацыянальным тэлевізійным кантэнце на дадатак да змененага закону аб СМІ, які запрацуе ад снежня. У ім гаворыцца пра абавязак тэлеканалаў мець прынамсі 30 % праграмаў айчыннай вытворчасці. Якой якасці?

У жніўні Аляксандр Лукашэнка падпісаў указ аб фактычным прыраўнанні дзяржаўных медыяў да аддзелаў дзяржаўнай прапаганды. А таму новыя пастановы, імаверна, маюць акрэсліць цяплічныя ўмовы для стварэння такога кантэнту з боку дзяржаўных СМІ, і наадварот – абмежавальныя рамкі для канкурэнтаў.

«Лукашэнка пад шумок змагання з расейскай прапагандай і фэйкамі спрабуе зачысціць поле ад канкурэнтаў, такіх як радыё «Рацыя», «Белсат», ЕРБ, а таксама ўнутраных канкурэнтаў, такіх як «Народная Воля», «Белгазета», «Камсамолка», тых, хто даюць незалежны погляд», – кажа віцэ-прэзідэнт «DIGITAL COMMUNIСATION NETWORK» Франак Вячорка.

Пакуль жа на тэлевізійным рынку кантэнт беларускай вытворчасці існуе хутчэй фармальна, для запаўнення сеткі дзяржаўных каналаў. У рэйтынгах 15 найбольш папулярных сярод гледачоў праграмаў фігуруе толькі «Добрай раніцы, Беларусь!». Рэшта – расейскія праграмы і серыялы.

Жыхары Менску:

«Гляджу «Белсат», але агулам беларускія рэдка».

«Навіны глядзім. Праграма «Время» і падобныя, НТВ, «Рамблер», «Лента».

«Тут.бай», «Медуза», «Лента.ру». – А чаму не глядзіце беларускае тэлебачанне? – А там прапаганда, не хачу глядзець».

А таму куды лепшая для інфармацыйнай незалежнасці краіны сітуацыя на рынку інтэрнэт-СМІ. Камерцыйны медыягігант TUT.BY штодня мае больш за 2 мільёны 200 тысяч наведнікаў, гэта амаль кожны другі беларус з інтэрнэт-доступам. TUT.BY узначальвае таксама рэйтынг інфармацыйных парталаў; адзінае дзяржаўнае выданне, якое трапіла ў рэйтынг, – «Савецкая Беларусія». Выданне з бюджэтным фінансаваннем і ўнікальным доступам да інфармацыі толькі замыкае дзясятку.

«Вядома, важна, каб задумваліся не толькі над вытворчасцю кантэнту, а і спажывальнікамі – намі з вамі. А для гэтага трэба прыкладаць высілкі для павышэння медыяпісьменства. Каб чытачы маглі прадуктыўна выкарыстоўваць розныя крыніцы інфармацыі – традыцыйныя і лічбавыя, і каб чытачы маглі ацэньваць якасць і верагоднасць інфармацыі, якую яны атрымліваюць», – кажа дырэктар даследчай кампаніі «#DB3» Міхаіл Дарашэвіч.

А для ацэнкі патрэбная колькасць. Не кантэнту, а рэдакцыяў з рознымі поглядамі.

Пасля крымскіх падзеяў у медыйных колах заіскрылася надзея аб прынамсі неварожым стаўленні дзяржавы да нацыянальных медыяў. Але апошнія скаардынаваныя дзеянні ўладаў паказваюць ясна: для Менску ёсць толькі дзяржаўныя рэдакцыі прапаганды, а любыя СМІ – патэнцыйныя ворагі. Проста сваіх душаць рэпрэсіямі, а расейцаў выцясняюць прыгожымі словамі пра «нацыянальны кантэнт».

Алесь Залеўскі belsat.eu

Глядзі таксама
Каментары