Аб'ектыў 01.05.2019 Інфармацыю пра жаданне ўцячы з Венесуэлы Мадура назваў жартам


Аўтамабіль венесуэльскай нацыянальнай гвардыі наязджае на ўдзельніка апазіцыйнай дэманстрацыі ў Каракасе 30 красавіка 2019 года. Фота – Ueslei Marcelino / REUTERS / Forum

Нікаляс Мадура мог уцячы на Кубу, але ў апошні момант яго спынілі расейцы. Гэткія заявы зрабіў дзяржсакратар Злучаных Штатаў Майк Пампэёў. Тым часам у Венесуэле працягваецца двоеўладдзе, а пратэст набірае ўсё больш драматызму. ЗША заяўляюць, што, калі гэта спатрэбіцца, гатовыя выкарыстаць войска дзеля развязання сітуацыі ў Венесуэле.

Пратэсты ў Венесуэле давяць у наўпроставым сэнсе гэтага слова. Пратэстоўцы кідаюць камяні і кактэйлі Молатава – бронетранспарцёры едуць на натоўп. З вуліцаў Каракасу прыходзяць драматычныя кадры. Лік пацярпелых ідзе на дзясяткі.

«Дзяржаўны пераварот супраць канстытуцыйнага ўраду, які я ўзначальваю, супраць легальных інстытуцыяў у Венесуэле, супраць Канстытуцыі і супраць міру ў краіне. І гэта не можа застацца непакараным!», – заявіў Нікаляс Мадура.

Да масавых пратэстаў напярэдадні заклікаў прызначаны парламентам выканальнік абавязкаў прэзідэнта Хуан Гуаідо:

«Сёння ў Мадура няма апоры ва ўзброеныя сілы. Сёння гістарычны дзень для краіны, пачатак канчатковае фазы аперацыі «Свабода» – дзеля заканчэння ўзурпацыі».

Прыхільнікі Хуана Гуаідо масава выходзяць на вуліцы.

Рэпартаж Вітаўта Сіўчыка глядзіце ў поўным выданні навінаў за 1 траўня

Прайшоў у Каракасе і мітынг у падтрыманне Нікаляса Мадура.

«Мы заўсёды будзем падтрымліваць прэзідэнта Мадура, усю нашую гісторыю свабоды і суверэннасці», – сведчыць удзельніца праўладнага мітынгу.

У Злучаных Штатах – а яны разам з больш як пяццюдзесяццю краінамі прызнаюць у якасці часовага кіраўніка Венесуэлы Хуана Гуаідо – заявілі, што перамога над Нікалясам Мадура амаль адбылася.

«Нікаляс Мадура быў ужо гатовы літаральна вылецець з краіны на сваім самалёце, пакуль яго не спынілі расейцы», – сцвердзіў дзяржаўны сакратар ЗША Майкл Пампэёў.

Нікаляс Мадура гэтую заяву ўспрыняў як жарт. МЗС Расеі заяву Пампэёў назвала «фэйкам» дзеля дэмаралізацыі венесуэльскага войска.



Людзі едуць на матацыклах каля згарэлага аўтобуса падчас антыўрадавых пратэстаў у Каракасе 30 красавіка 2019 года. Фота – Carlos Eduardo Ramirez

Масавыя пратэсты ў Венесуэле з рознаю перыядычнасцю ды інтэнсіўнасцю працягваюцца ўжо больш за пяць гадоў. У краіне, якая займае першае месца ў запасах нафты, у красавіку налічылі інфляцыю на больш як 1 500 000 % у гадавым вымярэнні. У Венесуэле перыядычна адключаюць электрычнасць, бракуе лекаў і харчоў.

Вітаўт Сіўчык/«Белсат», фота анонсу – Carlos Garcia Rawlins/Reuters/Forum

Глядзі таксама
Каментары