Былы галоўны трэнер зборнай Расеі па футболе Гус Хідынк зменіць Жузэ Мурынню на пасадзе настаўніка «Чэлсі». Як паведамляе «Тэлеграф», галандскі адмыслоўца будзе ўзначальваць «сініх» да канца сезону.
Партугальца напярэдадні звольнілі з гэтай пасады за незадавальняльныя вынікі. «Пенсіянеры» у турнірнай табліцы «прэм’ер-лігі» месцяцца на 16-ым радку, а ад зоны вылету адстаюць толькі на адзін бал. Хідынк у 2009-м годзе некалькі месяцаў выконваў абавязкі галоўнага трэнера «Чэлсі», аднак сумяшчаў гэтую пасаду з працаю ў зборнай Расеі. Аднак гэта не перашкодзіла яму выгуляць з «сінімі» Кубак Англіі. Апошнім месцам працы галандца была зборная Нідэрландаў, якую ён пакінуў у чэрвені 2015-га.