Купалаўскі рыхтуе прэм’еру! На сцэне беларускага тэатру мае паўстаць незвычайная пастаноўка – інклюзіўная – з удзелам дзяцей з аўтызмам. Між тым, каб спектакль пабачылі гледачы, патрэбныя сродкі.
14-гадовы мянчук Максім Лагун далучыўся да сямейнага інклюзіў-тэатру «І» 4 гады таму. Дыягназ хлопчыка – аўтызм – аніяк не перашкаджае яму быць на сцэне.
«Я знаёмлюся з людзьмі і дарослымі», – распавядае малады актор.
Глядзіце сюжэт у выданні «Аб’ектыву»:
Бацькі Максіма адзначаюць, што тэатр дапамагае сыну пачувацца лепей.
«Тэатр – гэта маленькае жыццё, а нам гэта вельмі патрэбна. Бо дзіцяці з аўтызмам вельмі важна быць у соцыуме», – кажа Кацярына Лагун, матуля хлопца.
Сёлета Максім грае адную з роляў у спектаклі «Аднойчы ў вялізным горадзе», які мусіць стаць першаю інклюзіўнаю прэм’ерай для Купалаўскага тэатру. Тое, што некаторыя акторы маюць аўтызм, на думку працаўнікоў тэатру, – не перашкода.
«У спектаклі граюць акторы, і гэта галоўнае. І гэтыя акторы гатовыя выходзіць на сцэну і рабіць мастацтва», – кажа Вольга Кулікоўская, кіраўніца аддзелу развіцця Купалаўскага тэатру.
Спектакль «Аднойчы ў вялікім горадзе» зроблены на падставе аповесці Дастаеўскага «Хлопчык у Хрыста на ялінцы».
«Спектакль даволі складаны, ён закранае філасофскія моманты. Пра адзіноту чалавека ў натоўпе, у вялікім горадзе, пра сяброўства, каханне, вечныя каштоўнасці, у тым ліку і смерць», – распавядае Ірына Пушкарова, мастацкая кіраўніца тэатру.
Кожны спектакль патрабуе грашовых выдаткаў. Каб акторы інклюзіўнага тэатру «І» змаглі выйсці на сцэну Купалаўскага тэатру, дапамагчы можа кожны з нас.
Падтрымаць спектакль «Аднойчы ў вялізным горадзе» можна на пляцоўцы «Ulej».
Да краўдфандынгавай кампаніі далучыліся і шмат якія вядомыя беларусы, сярод іх шматразовы чэмпіён свету па муай-тай Віталь Гуркоў, музыкі гурта «Nizkiz» і нобэлеўская лаўрэатка Святлана Алексіевіч. Збор сродкаў працягнецца да 14 лютага.
Ксенія Тарасевіч belsat.eu