Аб'ектыў 22.12.2018 «Гэта сон розуму»: актывістаў аштрафавалі за папяровыя караблікі каля расейскай амбасады


Караблі ад расейскай амбасады прыплылі ў суд. Актывістаў, якія месяц таму на знак падтрымання Украіны ў Керчанскім канфлікце пакінулі каля дыпламатычнага будынку папяровыя караблікі, аштрафавалі паводле ўсёй строгасці.

«Парушальнік парадку ўстанавіў цацачны караблік». Прыблізна такія фармулёўкі гучалі сёння ў судзе Цэнтральнага раёну Менску. Вядомы рэгулярным разглядам палітызаваных справаў суддзя Іван Касцян палічыў праяву салідарнасці з захопленымі Расеяй украінскімі маракамі «несанкцыянаваным масавым мерапрыемствам». Актывістам Яўгену Батуру і Святлане Каваленцы далі па 20 базавых (Br 490). Столькі ж атрымала журналістка газеты «Новы час» Дзіяна Серадзюк.

Дзіяна Серадзюк, журналістка газеты «Новы Час»: « Я была журналістам: рабіла фота, размаўляла з удзельнікамі. Караблікаў не ставіла. Тым не менш, сведкі сказалі – ставіла. Што тут можна каментаваць? Цырк ды і толькі».

Барыс Гарэцкі, Беларуская асацыяцыя журналістаў: «Суддзя не захацеў разбірацца ў справе. Вельмі шкада, што суд, міліцыя абмяжоўваюць правы журналістаў – правы, гарантаваныя нашым, беларускім Законам аб СМІ».

Анатоль Лябедзька, палітык, «Еўрапейскі дыялог»: «Я не ведаю, што рабіць у гэтай сітуацыі Макею і ягоным дыпламатам, якія тлумачаць, што ў Беларусі ўсё нармальна. Гэта проста сон розуму».

На самой акцыі, якая адбылася амаль месяц таму пад расейскаю амбасадай, абышлося без затрыманняў. Толькі аператары-аматары фіксавалі ўдзельнікаў на відэакамеры.

Святлана Каваленка, актывістка АГП, удзельніца акцыі: «Нейкі незразумелы падыход. Калі пасля трагедыі ў Кемераве прыходзілі да расейскай амбасады… Я запыталася ў міліцыянтаў: дзе, скажыце, пратаколы на тых людзей?».

Актывісты збіраюцца абскардзіць рашэнне суда, бо, паводле іх, не абскардзіць – значыць пагадзіцца з абсурдам.

Сцяпан Святлоў, «Белсат»

Фота вокладкі – spring96.org

Глядзі таксама
Каментары