Учорашняя рэкордная па даўжыні прамова Аляксандра Лукашэнкі выклікала розныя эмоцыі ў слухачоў: здзіўленне, роспач, нуду. Хтосьці пачуў у маналогу новыя матывы, а хтосьці кажа пра тую ж шарманку з году ў год.
Вось рэакцыя некаторых палітыкаў і публіцыстаў.
Мікалай Статкевіч, экс-кандыдат на прэзідэнта:
«Гэта ўсяго толькі традыцыйная штучна, імітаваная істэрыка перад аперацыяй выцягвання дадатковых грошай у збяднелага і таму прыжымістага «папіка».
Андрэй Саннікаў, экс-кандыдат на прэзідэнта:
«Гэта было страшна. Фактычна на чале дзяржавы стаіць чалавек, які гэтаю дзяржавай не кіруе, не жадае прызнаваць відавочных рэчаў і спрабуе апавяданнямі пра майткі развязаць эканамічныя праблемы. Жыццё ў Беларусі становіцца ўсё цяжэйшае, людзі ў роспачы лезуць на краны, каб адстаяць свае правы, але ўлады адмаўляюцца іх чуць».
Аляксандр Мілінкевіч, экс-кандыдат на прэзідэнта:
«Добра, што Лукашэнка цяпер разумее: Расея – галоўная небяспека, без Захаду аніяк. Але што да справаў у нашай любай Беларусі, то мы жывем у 2017 годзе, а Аляксандр Рыгоравіч у СССР. І адтуль дае парады і кіруе».
Святлана Калінкіна, публіцыстка:
«Слухала я Аляксандра Рыгоравіча і раптам зразумела, што ён усё ж такі збіраецца сыходзіць. Можа, ужо не сабраўся-сабраўся – так, каб рэчы са свайго кабінету вывозіць. Але ўжо сур’ёзна задумваецца пра гэта».
