Аляксандр Лукашэнка з’явіўся на публіцы з жартамі пра тое, што ведае, як яго заўчасна паспелі пахаваць. Адкуль і дзеля чаго ўзніклі чутка пра інсульт кіраўніка Беларусі?
Наведваючы поле ў Менскім раёне, Аляксандр Лукашэнка ў размове з мясцовым кіраўніком у жартаўлівай форме пракаментаваў чуткі пра свой інсульт.
«У наступным годзе мне паведаміш. Ты ж дажывеш да наступнага года? Але ты асабліва не заракайся. Мяне суткі таму пахавалі і цябе могуць пахаваць».
«Паўсталы з ТАГО свету» кіраўнік краіны паказаў народу, што разумее праблемы ГЭТАГА свету, дзе цяпер пануе сапраўднае ПЕКЛА:
«Можа быць, гэтыя 2–4 гадзіны не працаваць – трэба паберагчы людзей».
Калі людзям – некалькі гадзінаў адпачынку, то Лукашэнку – некалькі дзён. За два дні, што кіраўніка краіны не паказвалі па тэлевізары ў часе працы, разляцелася чутка пра інсульт.
Жыхары Менску:
«Кепска, канечне, калі ў чалавека інсульт і ўсё» (пасміхаецца)
«Ха-ха, што ён ёсць, што яго няма».
«Я ў шоку: добры чалавек, добры прэзідэнт, ён мне заўсёды падабаўся, будзе сумна, калі ён адыдзе з нашага свету».
Першым распаўсюдзіў інфармацыю пра хваробу Лукашэнкі тэлеграм-канал «Незыгарь», які публікуе нібыта інсайды з кулуараў расейскай улады. Парталу Naviny.by прадстаўнікі «Незыгаря» патлумачылі прычыну цікаўнасці да Беларусі.
«Нам цікавыя краіны, якія перабываюць на стадыі транзіту ўлады. У Беларусі працэс самабытны і востры. Ёсць запыт на змену ўлады, на абнаўленне».
Запыт, можа, і ёсць, але ці ёсць жаданне ў цяперашняга кіраўніка краіны пакінуць прэзідэнцкае крэсла? Раней ці пазней, але гэта непазбежна.
«Такія ўкідванні можна патлумачыць спробай спрагназаваць, прааналізаваць паводзіны грамадства», – адзначае палітолаг Павел Усаў.
Грамадства навіна пра інсульт Лукашэнкі не пакінула абыякавым.
Жыхары Менску кажуць:
«Па-першае, няма нікога, хто мог бы ачоліць дзяржаву гэтак жа, як Аляксандр Рыгоравіч, а з іншага боку – страшна пра гэта думаць».
«Калі скрэсліць Лукашэнку з улады, будзе разброд, анархія, бо ўсё на яго завязана».
«Зараз складаная геапалітычная абстаноўка, і, канечне, гэта несвоечасова».
«Такога яшчэ аднаго чалавека будзе складана знайсці ў Беларусі, магчыма, кандыдатура прэм’ер-міністра, ці нехта з яго каманды – стаць пераемнікам».
Апошні варыянт перадачы ўлады палітолагі называюць наменклатурнай трансфармацыяй, калі згодна з Канстытуцыяй на тры месяцы – да наступных прэзідэнцкіх выбараў – улада перайшла б да прэм’ер-міністра краіны.
«Наменклатура дзейная, найбольш уплывовыя фігуры вырашалі б, хто стаў бы прэзідэнтам. Па прынцыпе таго, што няма вельмі моцнай фігуры на сённяшні дзень, якая магла б заступіць Лукашэнку, то, напэўна, быў бы ўнутраны кампраміс», – мяркуе Павел Усаў.
Але гэта ў выпадку раптоўнай смерці, у выпадку ж хваробы дзейнага кіраўніка краіны паспеюць распрацаваць і іншы сцэнар – перадачу ўлады «ў свае рукі».
«Можа быць падрыхтаваны сцэнар «Пераемнік» – мадэль дынастычнай перадачы ўлады ад бацькі да сына, як гэта адбылося, напрыклад, у Азербайджане», – кажа палітолаг Павел Усаў.
Ужо менш як праз месяц Аляксандру Лукашэнку споўніцца 64 гады. І нават калі гэтым разам ў кіраўніка Беларусі інсульту не было, то, як кажа народная мудрасць, дыму без агню не бывае. Бледны выгляд Лукашэнкі таксама не абвяргае таго, што і ў моцнага лідара могуць быць слабыя месцы.
Вольга Старасціна, Белсат
Фота – president.gov.by