На 10 содняў асудзілі фігуранта «справы Ціханоўскага» Васіля Баброўскага за дзеянні, што парушаюць грамадскі парадак. Прысуд вынес Гарадзенскі абласны суд. Сам Баброўскі цяпер у СІЗА № 1 на Валадарскага ў Менску. Таксама судзілі сёння і за акцыі салідарнасці з затрыманымі. Па ўсёй краіне.
Арышты, штрафы, а цяпер і папярэджанні… Прысуды падчас выбарчай кампаніі ў Беларусі сыплюцца як з рога дастатку.
«Дзіўна, што далі толькі папярэджанне. Таму што ў навінах – у асноўным 20 базавых, 30 базавых усім давалі. Рэальна ў шоку», – кажа студэнт Мікалай Сянькевіч.
У Менску сёння масава судзілі ўдзельнікаў ланцуга салідарнасці, які адбыўся ў сталіцы 19 чэрвеня і скончыўся затрыманнямі. Пры гэтым у жорны беларускага правасуддзя трапілі і звычайныя мінакі.
«Гэта ў любым выпадку цырк, паколькі я гуляў з сяброўкай з сабакам і проста моўчкі падтрымліваў – ні пляскаў, ні крычаў, нічога не біў. І за гэта атрымаць пакаранне – гэта ўжо ў прынцыпе абсурд. І папярэджанне не моцна адрозніваецца для мяне ад содняў або штрафу», – гаворыць майстар будаўніча-мантажных работ Арцём Скапцоў.
Пратаколы за ўдзел у несанкцыянаваным масавым мерапрыемстве, а таксама за непадпарадкаванне міліцыі – гэта было пазней. Само затрыманне менчукі апісваюць так: ішлі з сябрамі, нечакана схапілі, шок. І нават параўноўваюць з выкраданнем.
«Ніхто не прадстаўляўся. Я не чула, каб было аб’яўлена, што мы ўдзельнічаем у нечым незаконным. Падбеглі са спіны, схапілі, на пытанні не адказвалі. Грубымі выразамі прасілі замаўчаць», – распавядае жыхарка Менску Кацярына Маліноўская.
Аліне Стаўровай пашанцавала яшчэ менш. Пасля брутальнага затрымання ёй давялося нават здымаць пабоі ды пісаць заяву.
«Мяне схапілі з двух бакоў. Пры гэтым мяне трэслі. Праз гэта я атрымала траўмы – цялесныя пашкоджанні. І сілай закінулі ў мікрааўтобус. На мужа, які ўжо ляжаў на падлозе там», – распавядае бізнес-аналітык Аліна Стаўрова.
Суды адбыліся сёння і ў Воршы. Удзельнікаў мясцовага ланцуга салідарнасці асудзілі да арышту. Паўла Парфененку – на 10 дзён, Аляксандра Андрэева і Генадзя Ларыёнава – на 15 содняў.
«Справядлівым я гэта не лічу. Мяне другі раз асудзілі за апошнія два месяцы. Гэты раз я пабыў на плошчы літаральна 15 хвілін. Праязджаў побач, падышоў да хлопцаў – і ўсё, за гэта асудзілі – 15 содняў, я не чакаў», – кажа валанцёр ініцыятыўнай групы Ціханоўскай Генадзь Ларыёнаў.
Да суда актывісты правялі трое содняў у ізалятары часовага ўтрымання. А вось пасля паседжання іх нечакана вызвалілі. Відавочна, што адбываць пакаранне прыхільнікі Сяргея Ціханоўскага будуць пазней.
«Хочуць, напэўна, да 9 жніўня – у момант, самы не адпаведны для дзяржавы, – самых актыўных і пасадзіць, каб не было заклікаў, людзей не збіралі», – мяркуе адміністратар тэлеграм-каналу «Орша для жизни» Аляксандр Андрэеў.
«Адчуванне, што затрыманні ідуць па плане – вось столькі чалавек трэба затрымаць. Бо, акрамя дваіх чалавек, адзін трапіўся на самым ланцугу, другі першы раз трапіўся, усе астатнія – тыя ж, каго арыштоўвалі ў першы ж дзень абвяшчэння выбараў у Воршы», – гаворыць праваабаронца Ігар Казмерчак.
У Віцебску таксама судзілі ўдзельнікаў мясцовага ланцугА салідарнасці. Затрыманаму напярэдадні Руслану Ахрымуку прысудзілі 7 содняў арышту. Аляксандр Мацяюк, якога тыдзень таму за ўдзел у несанкцыянаваным мерапрыемстве аштрафавалі, гэтым разам штраф на 108 рублёў атрымаў за непадпарадкаванне міліцыі.
«Станоўчае рашэнне для мяне было б толькі апраўданне. Але ж не кінулі ў клетку. Дзякуй на гэтым, што не кідаеце ў клетку кожную нядзелю. Кожную суботу я заязджаю да вас на ІЧУ. Гэтую суботу я на свабодзе. Дзякую», – кажа актывіст Аляксандр Мацяюк.
Паводле праваабаронцы, артыкул 23 пункт 4 праваахоўнікі выкарыстоўваюць, каб замесці сляды брутальных затрыманняў. Аляксандр скардзіўся на збіццё.
«Калі 23.4 выстаўляюць – непадпарадкаванне, – гэта значыць, альбо міліцыя перастрахоўваецца адносна рашучых дзеянняў чалавека затрыманага, што намераны здымаць пабоі, альбо ў матэрыялах справы ёсць відэа, якое пацвярджае, што чалавек супраціву не аказваў», – гаворыць праваабаронца Ірына Траццякова.
Акцыі салідарнасці з затрыманымі актывістамі, калі людзі выбудоўваліся ў жывыя ланцугі ўздоўж вуліцаў і праспектаў, праходзілі па ўсёй краіне з 18 да 21 чэрвеня. Па падліках праваабаронцаў у гэтыя дні ў 19 гарадах затрымалі больш за 360 чалавек.На мінулым тыдні над удзельнікамі ланцугоў салідарнасці прайшло больш за 100 судоў. Чарговыя працэсы адбудуцца ўжо заўтра.
Анастасія Русецкая, «Белсат»