Беспрэцэдэнтным прыкладам сяброўства паміж Кітаем і Беларуссю Лукашэнка назваў будоўлю двух новых аб’ектаў у Менску – нацыянальнага футбольнага стадыёну і басейну міжнароднага стандарту. Праект сёння абмеркавалі падчас адмысловай нарады ў кіраўніка краіны.
Аляксандр Лукашэнка, кіраўнік Беларусі:
«Я прасіў падрыхтаваць праекты ўказаў з упорам на гэта. Каб мы, атрымаўшы бясплатныя грошы, не валакіцілі кітайцаў. Гэта яны будуць будаваць гэты абʼект. Вядома, з нашых матэрыялаў, нашы людзі будуць там працаваць у асноўным. Але каб у кітайцаў не было скаргаў, што ў нас там нейкія незразумелыя стандарты, якія засталіся, напэўна, не тое што з савецкіх часоў, да рэвалюцыі яшчэ паводле некаторых з іх будавалі».
Першапачаткова чакалі, што стадыён пабудуюць кампаніі Юрыя Чыжа, які ў той час кіраваў футбольным клубам «Дынама», аднак бізнесоўца ў выніку адхілілі ад праекту, а кантракт перадалі кітайцам.
Новыя абʼекты мусяць быць пабудаваныя да 2023 года. Гэтак, футбольны абʼект агульнаю плошчаю 48 тысячаў квадратных метраў узнікне каля стадыёну «Трактар». Басейн – на месцы былой фабрыкі «Чырвоная зорка» на вуліцы Кальварыйскай. Агульны кошт праектаў – 235 мільёнаў долараў.
«Звычайна Кітай такім чынам дзейнічае ў іншых краінах. Такім чынам ён паказвае свой уплыў у іншых рэгіёнах. Так было, да прыкладу, у Афрыцы, дзе яны таксама будавалі футбольныя стадыёны. І таксама на бескаштоўнай аснове», – тлумачыць Аляксандр Заяц, эканамічны аглядальнік, намеснік рэдактара Tut.by.
Сёлета ў красавіку амбасадар Беларусі ў Кітаі Кірыл Руды паведамляў, што Паднябесная плануе перайсці ад крэдытавання нашай краіны да наўпроставых інвестыцыяў. Аднак пакуль доля кітайскіх інвестыцыяў у Беларусь невялікая: летась яна склала ўсяго крыху больш за тры адсоткі.
«Менску, канечне ж, хацелася б перайсці на прамыя інвестыцыі, але, верагодна, Кітай нечым не задаволены ў гэтых стасунках, таму да сённяшняга дня гэткая парадыгма, скажам так, адносінаў», – дадае Аляксандр Заяц, эканамічны аглядальнік, намеснік рэдактара Tut.by.
На сёння мы вінныя Кітаю больш за 3 мільярды долараў. За гэтыя пазыкі электрыфікавалі чыгунку, часткова прафінансавалі завод «Белджы», а, бадай, самае галоўнае – будоўлю індустрыйнага парку «Вялікі камень». А што б хацелі бачыць за кітайскія інвестыцыі беларусы?
«Яшчэ некалькі лядовых палацаў».
«Пляж круты».
«Аздараўляльны комплекс які-небудзь для дзетак».
«Эйфэлеву вежу. Нядрэнна было б».
«Ой… Кватэры, дамы і заробкі людзям бы добрыя».
«Бясплатны сыр бывае толькі ў мышалоўцы», – кажуць менчукі.
Не ўсе кітайскія праекты былі паспяхова зрэалізаваныя ў Беларусі. Гэтак, улады разарвалі кантракты на паслугі кітайскіх генеральных падрадчыкаў, якія будавалі заводы ў Добрушы ды Светлагорску. Апошні абʼект – завод беленай цэлюлозы – яшчэ летась на афіцыйным узроўні прызналі шкодным для здароўя мясцовых жыхароў.
Віталь Бабін, belsat.eu