Уладам неабходна пераставіць дзяржпрадпрыемствы на рынкавыя рэйкі ды перастаць субсідаваць тарыфы ЖКГ. Міжнародны валютны фонд не адмаўляецца ад ранейшых патрабаванняў да Менску. Пра гэта журналістам паведаміў кіраўнік місіі МВФ у нашай краіне. Якіх зменаў чакаюць заходнія эканамісты і ці гатовыя на іх пайсці ўлады ды простыя грамадзяне?
Дзяржсектар патрабуе «глыбейшых рэформаў, чым мы бачылі да гэтае пары». У інтэрв’ю агенцтву БелаПАН кіраўнік місіі Міжнароднага валютнага фонду Жак Міньян заявіў, што ключ да развязання эканамічных праблемаў Беларусі МВФ бачыць у рэформе дзяржпрадпрыемстваў. Пераставіць іх на рынкавыя рэйкі можна як перадаўшы ў прыватныя рукі, гэтак і пакінуўшы ў дзяржаўнай уласнасці.
«Гэта можа быць банкруцтва, гэта можа быць прыцягненне партфельнага інвестара пры захаванні кантрольнай долі акцыяў у дзяржавы. Гаворка ідзе пра тое, каб аддзяліць ролю дзяржаўных органаў як уласнікаў прадпрыемстваў ад ролі рэгулятараў», – кажа Вадзім Іосуб, старэйшы аналітык «Альпары».
Вымушаныя аддаваць нагандляванае дзяржаве, узалежненыя ад субсідыяў, дзяржаўныя заводы не маюць стымулаў працаваць лепш. Паводле парталу banki24.by, у студзені больш за 40 % буйных і сярэдніх прадпрыемстваў жылі толькі дзякуючы кропельніцы дзяржаўных крэдытаў.
«Рэформы, якія прапаноўвае МВФ, уладам Беларусі могуць падацца прымальнымі толькі ў адным выпадку – калі сітуацыя будзе вельмі і вельмі дрэнная ды іншых крыніцаў фінансавання, апроч крэдытаў Міжнароднага валютнага фонду, ва ўладаў не будзе», – тлумачыць эканаміст Сяргей Балыкін.
Замест таго, каб пазбаўляцца татальнага кантролю над дзяржаўнымі заводамі, улады праводзяць мадэрнізацыю – купляюць на іх новае абсталяванне.
Дрэваапрацоўка, НПЗ і цэментавыя заводы, у якія ў апошнія гады ўклалі мільярды долараў, сталі галоўнымі генератарамі стратаў у беларускай эканоміцы. Затое прыбытковыя аказаліся сектары, якія мадэрнізацыя абмінула, напрыклад, хімічная прамысловасць ды знакаміты ІТ.
«Задумваецца мадэрнізацыя з думкай «асвоіць» нейкі абʼём грошай. Пры гэтым не бачна маркетынгу, не пралічваюцца рынкі: што, па якім кошце і куды будзе прадаваць гэтае мадэрнізаванае прадпрыемства», – дадае аналітык Вадзім Іосуб.
МВФ настойвае яшчэ і на іншай рэформе – павышэнні тарыфаў на ацяпленне да 100 адсоткаў іх сабекошту. Цяпер, паводле ўраду, мы плацім толькі пятую частку. Эканаміст Сяргей Балыкін гаворыць:
«Праблема не субсідыі самі па сабе, а менавіта перакрыжаванае субсідаванне. Гэта значыць, што прадпрыемствам прадаюць цеплавую энергію па цэнах, нашмат вышэйшых за сабекошт, каб насельніцтву прадаць яе ніжэй за сабекошт. І гэта ставіць прадпрыемствы ў эканамічны тупік».
Сямʼя, якая жыве ў двухпакаёвай кватэры, узімку ў сярэднім плоціць за ацяпленне 24 рублі на месяц. Поўны ж кошт складае ў сярэднім 120 рублёў. Ці ў стане плаціць такія грошы грамадзяне?
«У пяць разоў? Вы смеяцеся ці што? У нас пенсія 400 рублёў!»
«Мне больш бʼюць па кішэні тарыфы для юрыдычных асобаў. У нас памяшканне ў нежылым фондзе, мы за яго плацім суму ў дзесяць разоў большую за кошты звычайнай кватэры».
«Не хацелася б, вядома. Гэта дорага для нас. Тады давайце і заробкі павышаць – у пяць разоў!»
«Трэба нешта рабіць, бо мы ўвогуле нішчэем», – прызнаюцца жыхары Гомля.
Перакрыжаваныя субсідыі Міжнародны валютны фонд прапаноўвае замяніць адраснаю сацыяльнаю дапамогай. Ісці на гэта, як і рэфармаваць дзяржаўныя прадпрыемствы нашыя ўлады не пагаджаюцца.
Менавіта таму перамовы аб атрыманні крэдыту МВФ памерам 3 мільярды долараў, якія Менск вёў два гады таму, скончыліся беспаспяхова.
Аляксандр Папко, belsat.eu