Паўтара мільёна карыстальнікаў YouTube паглядзелі стужку блогера NEXTA «Лукашенко. Уголовные материалы».
«Абранне прэзідэнтам калгаснага крыкуна не павіннае было прывесці краіну да катастрофы. Крыкун пачаў перакройваць законы і рэальнасць пад сябе» (фільм «Лукашенко. Уголовные материалы»).
Сотні тысяч беларусаў пачулі абвінавачанні на адрас Лукашэнкі ў парушэннях закону – ад змены Канстытуцыі да загадаў распраўляцца са сваймі апанентамі.
«У мяне ў жылах кроў пачынае кіпець, калі б міністры, Мальцаў былі побач, я б іх дакладна прыстрэліў уласнаручна» (фільм «Лукашенко. Уголовные материалы»).
Пад фільмам – дзясяткі тысяч каментароў, гледачы пытаюцца: калі паказанае праўда, то што рабіць далей?
«Просьба да Сцяпана Нехты: калі ідзеш наперадзе ўсіх, калі сказаў А, скажы і Б. Адказнасць на сябе трэба браць: паколькі пачынаеце падымаць праблемы – давайце рашэнні», – прапануе блогер Mozgon.
Знайсці рашэнні онлайн не атрымалася, таму NEXTA ды іншыя беларускія блогеры прапанавалі сваёй шматтысячнай арміі падпісантаў сустрэцца афлайн. І не абы-дзе, а на плошчы Свабоды.
«Я не думаю, што шмат беларусаў падтрымае такі фармат. Я не лічу гэта сумленным. Прыедзь у Менск, выйдзі разам з намі на Плошчу, наперадзе калоны, ззаду, пасярэдзіне – дзе табе будзе больш падабацца, і тады ты маеш маральнае права на любыя заклікі, любую крытыку», – сцвярджае журналістка Святлана Калінкіна, галоўная рэдактарка сайту «Беларускі партызан».
А што самі беларусы, ці гатовыя выйсці на плошчу на заклік, гэтым разам не апазіцыйных палітыкаў, а новых лідараў грамадскай думкі – блогераў?
«Хацелася б паўдзельнічаць, хацелася б пабыць, бо бачна, што людзі хочуць нейкіх адказаў, і мне здаецца, што было б правільным рашэннем выйсці на вуліцу і патрабаваць гэтых адказаў».
«Людзі не проста не хочуць туды пайсці, людзі напалоханыя і баяцца наступстваў».
«Я хачу як мага хутчэй пакінуць краіну, памяняць месца жыхарства і ўсё».
«Калі разгоняць, то правільна зробяць, і яшчэ добра дубінкаю б даць і закрыць у міліцыю».
Гэтак зрабілі ўлады на Плошчы ў 2010 годзе. Тады гучалі такія заклікі: «Сыходзь!»
Але NEXTA сцвярджае, што ў пятніцу рэвалюцыі не будзе! Акцыя 8 лістапада плануецца непалітычная, у межах закону, бо адбудзецца падчас дазволенага перадвыбарчага пікету кандыдатаў на дэпутацтва:
«Будзе нешта накшталт банку ідэяў, дзе кожны зможа прапанаваць нешта сваё, развязанне праблемаў, таксама я буду на акцыі, магчыма не фізічна, нейкім чынам буду».
Наўрад ці не віртуальнага NEXTA будуць радыя пабачыць улады Беларусі.
«Калі я прыеду ў Беларусь, мне свеціць як мінімум 5 артыкулаў Крымінальнага кодэксу, пачынаючы ад абразаў Лукашенкі да экстрэмізму», – кажа блогер NEXTA.
Блогер чакае, што на акцыю прыйдзе нават менш за адзін адсотак тых, што праглядзелі фільм. Эксперты пацвярджаюць, што тое, што гудзе ў інтэрнэце – часта там і застаецца, сеціва не пакідае.
«Для таго, каб з’явіўся пратэст, неабходна, каб у грамадстве зʼявілася нейкая надзея. У сваю чаргу падчас Перабудовы Гарбачоў даў надзею, што будзем жыць інакш. Цяпер нічога падобнага няма», – перакананы Сяргей Нікалюк, палітолаг.
А можа, з’явіцца? Дарэчы, менавіта надзею Сцяпан Святлоў і абяцае:
«Я спадзяюся крыху зрушыць, нейкі двіж пачаць у гэтым кірунку, таму што пакуль, на жаль, нічога значнага ў беларускім інфармацыйным полі не адбываецца, каб крыху разварушыць людзей, даць ім надзеі на будучыню. Ну і праз год прэзідэнцкія выбары – там будзем глядзець».
А пакуль у пятніцу замест рэвалюцыі на Плошчы блогеры спадзяюцца зладзіць рэвалюцыю ў розумах тых, хто дагэтуль выказваўся ананімна і онлайн.
Вольга Старасціна belsat.eu