Пад хэштэгам #ямыбреста ў сеціве – безліч выбоінаў і іншых пашкоджанняў дарожнага пакрыцця ў Берасці. Кампанія «За свой горад» збірае ад жыхароў скаргі і накіроўвае выканаўчай уладзе і ДАІ.
Пасля дажджу ўсе яміны выглядаюць аднолькава. Глыбіню праблемы ў адным з берасцейскіх двароў па вуліцы Маскоўскай кіроўца Валянцін Лазарэнкаў вымяраў лінейкаю.
Валянцін Лазарэнка, кіроўца, арганізацыя «За свой горад»:
«14 см – гэта значыць, што там можна кола пакінуць, выбіць. Гэта ж цэнтральнае месца. Тут супермаркет «Алмі», пляцоўка спецыяльна ўладкаваная для машын».
Тая яміна ў ліку 1001-я з яшчэ не залатаных у Берасці да тысячагоддзя гораду, якое адсвяткуюць у сярэдзіне верасня. Падобныя выпадкі збірае група берасцейцаў, аб’яднаная ў арганізацыю «За свой горад». Праз сваю старонку і сацыяльныя сеткі актывісты месяц таму абвесцілі кампанію #ямыбреста.
Ігар Маслоўскі, кіроўца, арганізацыя «За свой горад»:
«Мы раз на 10 дзён збіралі гэтыя фотаздымкі з хэштэгам #ямыбреста і апісаннем кожнага выпадку і складалі комплексныя скаргі. Накіроўвалі дакументы ў ДАІ ды Берасцейскі гарвыканкам».
Яшчэ нядаўна на вуліцы Абаронцаў Айчыны ў Берасці быў «супрацьтанкавы роў». Гэтак мясцовыя называлі ўчастак дарогі, які гарадскія службы «зашылі» праз тыдзень пасля скаргі ў межах кампаніі. Вайна за выжыванне на гэтым адрэзку скончылася. Але горад багаты на іншыя, кажуць берасцейцы:
«Не даглядаюць за дарогаю па вул. Янкі Купалы каля дому №100а, дзе гаражы і аптэкавыя склады».
«Робяць павольна праз недастатковае фінансаванне. Прадпрыемтваў, якія гэтым займаюцца, мала, яны манапалісты. Наколькі мне вядома – гэта «Белаўтадорсервіс» і «СТіМ».
Новыя дарогі будуюць паводле больш трывалай тэхналогіі, а на перасланне старых то час неадпаведны, то фінансавання няма. У якасці таблеткі (якая не лекуе, а часова пазбаўляе ад болю) улады пагаджаюцца на заплаткавы рамонт.
Урывак з адказу на скаргу ад Берасцейскага гарвыканкаму:
«У першую чаргу адбываецца рамонт вуліцаў з найбольш інтэнсіўным рухам транспарту і пакрыццё якіх мае значныя пашкоджанні. Пасля 15 траўня будзе выконвацца ямінавы рамонт праездаў у дварах».
Менавіта гэтага чакае большасць удзельнікаў марафону #ямыбреста. Бо чым далей ад цэнтральнай вуліцы – тым больш выбоінаў напаткае колы.
«Мы прывучаем людзей не баяцца, каб яны публічна агучвалі праблемы, збіралі, а далей мы ўжо комплексна накіроўваем гэтыя скаргі. Мы заклікаем людзей да актыўнай дзейнасці», – кажа Ігар Маслоўскі, «За свой горад».
Магчымасць уплываць на наваколле даюць яшчэ дзве інтэрнэт-платформы краіны – дзяржаўны праект Мой горад (пад адрасам 115.бел) і праект Зручны горад – petitions.by.
«Калі раней вы ўмоўна тэлефанавалі ў ЖЭС паведаміць пра дрэнную дарогу, вам адказвалі «мы нешта зробім» і на гэтым усё спынялася. Тут такі варыянт ужо не «пракоціцца», бо цяпер трэба даць адказ, напрацягу якога часу будзе зроблена», – тлумачыць блогер і фатограф Антон Матолька.
Платформа «За свой горад» – ужо трэцяя з ліку мабілізацыйных для дзяржавы. Паўстала ў Берасці, але пазіцыянуе сябе як арганізацыя для развіцця ўсяе краіны.
Юлія Цяльпук, belsat.eu
