Аб'ектыў 16.06.2019 Берасцейцы не вераць Лісу і выйшлі на акцыю пратэсту супраць акумулятарнага заводу


Больш за 200 жыхароў Берасця выйшлі на цэнтральную плошчу, каб зноўку пакарміць птушак на знак мірнага пратэсту. Штотыднёвая акцыя супраць акумулятарнага заводу «АйПаўэр» сёння прайшла з адценнем радасці, бо мясцовыя ўлады пагадзіліся прыпыніць працу заводу.

«Былі 2 дакументы: загад Ліса, кіраўніка Берасцейскай вобласці, і загад Мінпрыроды пра тое, што завод прыпыняе дзейнасць у выходныя і начны час», – кажа Юлія Зубік, удзельніца мірнай акцыі.

Амаль 40 тысяч подпісаў супраць будаўніцтва заводу, паўтара года штотыднёвых масавых акцыяў пратэсту – яшчэ да пачатку будаўніцтва – і мясцовыя ўлады, і адміністрацыя Лукашэнкі ігнаравалі. Былі і затрыманні, і крымінальныя справы аб нібыта абароце боепрыпасаў, і прыход міліцыі дадому. Але людзі вытрымалі.

«Экспертыза пасля першага месяца працы заводу па ўтрыманні свінцу, я мяркую, прымусіла іх падумаць, што будзе далей», – спадзяецца Андрэй Сліж, адзін з актыўных праціўнікаў заводу.

Пакуль на «АйПаўэры» наладжвалі абсталяванне, ініцыятыўная група праціўнікаў заводу арганізавала «Свінцовую варту». У выніку падчас дзяжурства актывісты заўважылі зліў вадкасцяў з заводу ў каналізацыю – уначы.

«За тэрыторыяй знайшлі мы па схеме каналізацыі заводу калодзеж, куды ўсё злівалася, адкрылі яго. Правялі тэст, спачатку самі, лакмусавай паперкай. Аказалася, канцэнтраваная шчолач. Дзмітрый Бекалюк адправіў пробу на »Водаканал«, там пацвердзілі», – распавёў удзельнік «Свінцовай варты» Алег Вялаў.

Працы на заводзе прыпыненыя, але гэта яшчэ не перамога. «АйПаўэр» распачынае працэдуру паўторнай экалагічнай экспертызы. А кіраўніку Берасцейскай вобласці пратэстоўцы пакуль не вераць.

«На 100 % верыць немагчыма. Бо на сустрэчу з Лісам было 10 заявак. І толькі цяпер, калі нашыя хлопцы паказалі забруджванне, ён пайшоў насустрач. А ўсяго гэтага можна было б пазбегнуць», – мяркуе Людміла Карчэўская, якая прыйшла сёння на мірны пратэст.

«Падчас сустрэчы з Анатолем Лісам мы агучылі сваю пазіцыю: наш пратэст будзе доўжыцца да поўнага закрыцця заводу», – папярэджвае Юлія Зубік.

Мясцовыя жыхары не толькі лічаць акумулятарны завод побач з Берасцем патэнцыйна небяспечным, але і патрабуюць справядлівасці.

«Ажно да прыцягнення да адказнасці тых, хто дапусціў парушэнне ўсіх законаў пры будаўніцтве заводу, пры ўводзе ў эксплуатацыю, пры праектаванні», – кажа Андрэй Сліж.

Акцыя ў прысутнасці людзей у цывільным і міліцыянтаў з мегафонамі прайшла спакойна, без затрыманняў. Людзі прайшлі па цэнтральных вуліцах і дамовіліся сустрэцца ў наступную нядзелю, каб пракантраляваць, як улады выконваюць абяцанні.

Яраслаў Сцешык belsat.eu

Глядзі таксама
Каментары