Аб'ектыў 23.08.2018 «Белсат» распавёў пра пустыя крамы на Кармяншчыне – туды пачалі завозіць харчы. Але на журналістаў завялі справу


У сельскіх крамах не было неабходных тавараў, а вінаватымі сталіся журналісты.

Актывіст незалежнага прафсаюзу радыёэлектроннай прамысловасці Аляксей Паўлоўскі збірае подпісы сярод жыхароў Стараградскага сельсавету, што на Кармяншчыне, у абарону гомельскіх журналістаў-фрылансераў, сюжэт якіх на «Белсаце» змусіў чыноўнікаў заварушыцца і ліквідаваць дэфіцыт.

«Дзякуючы незалежным журналістам у вёсках і крамах Стараградскага сельсавету з’явіліся неабходныя харчовыя прадукты і тавары штодзённага попыту», – адзначае Аляксей Паўлоўскі.

Пры гэтым асартымент тавараў палепшыўся не толькі ў крамах Стараградскага сельсавету, але і ўва ўсім Кармянскім раёне.

«У нас тры разы на тыдзень завоз. Тавар прыбавіўся. Сёння атрымалі марозіва, атрымаем «раздзелку», гародніну. Гэта ўсё будзе сёння», – кажа прадавачка з вёскі Хізаў Ларыса Пімашэнка.

Між тым разам з доўгачаканымі таварамі зʼявіліся і праблемы ў журналістаў, якіх улады звыкла абвінавацілі ў незаконным вырабе прадукцыі СМІ.

Аляксей Паўлоўскі, які з’яўляецца жыхаром Стараградскага сельсавету, распавядае пра сваю ініцыятыву:

«За свабоду слова я пачаў збіраць подпісы ў сувязі з тым, што прыбыў супрацоўнік міліцыі і сказаў, што на гэтых журналістаў 77 пратаколаў ужо было і рыхтуецца яшчэ на 10 мільёнаў штраф».

Гаворка ідзе пра фрылансераў Андрэя Толчына і Кастуся Жукоўскага. Апошні раней супрацоўнічаў з «Белсатам» і сярод нашых калег быў адным з найбольш рэпрэсаваных уладамі за сваю прафесійную дзейнасць.

Вясковыя жыхары падтрымалі ініцыятыву спадара Аляксея і выступілі ў абарону журналістаў.

Агулам пад зваротам у суд Кармянскага раёну, у якім і мае разглядацца гэта справа, падпісаліся каля трох дзясяткаў вяскоўцаў.

Зміцер Лупач, «Белсат»

Глядзі таксама
Каментары