Апазіцыйныя кандыдаты ў Палату прадстаўнікоў працягваюць выкарыстоўваць пікеты для змагання з пагрозамі ад шкоднай вытворчасці: без надзеі на мандат дэпутата, але з надзеяй на чыстае паветра.
«Спынім хімічны Чарнобыль!» Нядзельны пікет кандыдаткі ад АГП Таццяны Сівачэнкі быў прысвечаны пратэсту супраць расейскага заводу «Омск-Карбон Магілёў», які маюць запусціць да канца гэтага года.
«Я хачу падняць праблемы экалогіі. Толькі ў перыяд перадвыбарчай кампаніі мы маем права вось так афіцыйна стаяць з плакатамі і агітаваць людзей», – кажа Сівачэнка.
Акрамя гэтага кандыдатка заахвочвае грамадзянаў станавіцца назіральнікамі, каб чарговы раз зафіксаваць парушэнні працэдуры выбараў. Пра тое, што галасы на ўчастках як след не палічаць, у АГП гавораць ужо цяпер.
«Партыя, якая займаецца выбарамі, якая мае дзесяць кандыдатаў у Магілёўскай вобласці, у нас няма ніводнага прадстаўніка ні ў воднай камісіі ў гэтай вобласці», – гаворыць чалец партыі Уладзімір Шанцаў.
Не верыць у сумленнасць выбараў і большасць апытаных намі магілёўцаў:
«Выбары адбудуцца ў такім жа фармаце. Нічога новага не адбудзецца».
«Я думаю, што нічога не зменіцца. Усё будзе, як і было».
«Я стараюся не ўнікаць у палітыку, яна мне не падабаецца. Мне яе не выкладалі ва ўніверсітэце, яна мне не падабаецца».
У іншым канцы Беларусі – у Берасці – кандыдат на дэпутата Уладзімір Мароз таксама ўздымае пытанні экалогіі. Мітынг з патрабаваннем канчаткова закрыць акумулятарны завод «АйПаўэр» запланаваны на 3 лістапада ля Палацу культуры прафсаюзаў.
Сёння ж на галоўнай плошчы Берасця больш за 100 чалавек зноў вышлі на традыцыйнае кармленне галубоў.
«Людзі маюць атрымліваць годны заробак у сябе на радзіме. Не – заводу АКБ! Не будаўніцтву атамнай электрастанцыі! Баста рэжыму Лукашэнкі! Баста калгаснай дыктатуры!», – гучала сёння ля стэндаў кампаніі «Еўрапейская Беларусь».
Пратэстоўцы нагадваюць: на прадпрыемстве працягвае назірацца актыўнасць.
«Кожны дзень прыязджаюць 20–25 чалавек на працу, ідзе нейкі тэхпрацэс. Рэгулярна прыязджае і з’язджае грузавы транспарт», – гаворыць удзельнік «свінцовае варты» Алег Вялаў.
Улады пакуль ніяк не рэагуюць на выяўленыя факты, кажа актывіст.
Затое не зарэгістравалі кандыдатамі на дэпутацтва праціўнікаў акумулятарнага заводу Рамана Кісляка і Алену Макарэвіч.
«Я лічу, што меў месца падман. Гэта злачынства, якое мае расследавацца нашымі праваахоўнымі органамі», – кажа актывістка.
Праваахоўныя органы ж сёння з мегафонам спрабавалі сагнаць з плошчы людзей, якія кармілі галубоў.
«Калі ўлады хочуць атрымаць сацыяльны выбух перад выбарамі, яны атрымаюць. Усе перадумовы да гэтага ёсць, гэта нерэгістрацыя кандыдатаў паводле надуманых прычынаў, калі працягнецца ў тым жа духу, сацыяльная напружанасць будзе расці», – зазначае праціўнік акумулятарнага заводу Зміцер Бекалюк.
Актывісты сцвярджаюць, што будуць працягваць выходзіць на плошчу, прынамсі, пакуль пытанне заводу не развяжуць раз і назаўсёды.
Вітаўт Сіўчык belsat.eu
