Аб'ектыў 22.02.2017 Абарона Курапатаў: правакацыі, збіццё актывістаў і крымінальная справа


Адкрыццё выставы «Праўда пра Курапаты», якая месціцца ў менскім Палацы мастацтваў і прысвечаная гісторыі сумнавядомага ўрочышча – бадай найбольш мірная з сённяшніх падзеяў вакол месца сталінскіх масавых расстрэлаў. Чарговы дзень змагання за нацыянальную памяць – і зноў правакацыі і збіццё актывістаў.

Жарсці на будаўнічай пляцоўцы ў сталічным мікрараёне Зялёны Луг

Не зважаючы на надвор’е, супрацьстаянне напаляецца амаль кожную хвіліну. Грамадскія актывісты, якія пратэстуюць супраць узвядзення бізнес-цэнтру на ўскрайку ўрочышча Курапаты, літаральна кідаюцца пад будаўнічую тэхніку, спрабуючы спыніць злачынства. У адказ іх адкідаюць у бруд ды збіваюць.

«Людзі, пераапранутыя ў будаўнічую форму – гэта пераапранутыя амапаўцы. Яны тут будаўніцтвам не займаюцца, а збіваць абаронцаў Курапатаў», – сведчыць адзін актывіст Аляксандр Варошка.

Першыя пратаколы, першыя затрыманні

Міліцыянты ж, апранутыя ў службовую форму, замест абароны пацярпелых актывістаў затрымалі аднаго з іх – Паўла Старавойтава, які ў час сутыкнення нібыта ўдарыў па відэакамеры ўмоўна невядомага аператара ў цывільным. А таксама склалі некалькі адміністратыўных пратаколаў супраць актывістаў за блакаванне тэхнікі.

Сёння ж ад забудоўніка стала вядома і пра крымінальную справу, заведзеную супраць абаронцаў Курапатаў напярэдадні. АТА «Белрэканструкцыя» падлічыла, што абарона Курапатаў нанесла арганізацыі страты на тры тысячы рублёў.

Пазней міліцыя абвергла інфармацыю пра завядзенне крымінальнай справы

Праваахоўнікі цвердзяць, што аніякай крымінальнай справы няма: вядзецца звыклае правяранне. Тым часам грамадскія актывісты перадалі сталічным уладам зварот з патрабаваннем прыпыніць будаўніцтва ў Курапатах на час разбіральніцтва ў сітуацыі ды сустрэліся з намеснікам старшыні Менгарвыканкаму Віктарам Лапцевым.

«У выніку, ён прадэманстраваў гатоўнасць як мінімум – разбірацца далей у гэтай сітуацыі. Гэта не была пазіцыя – маўляў, усё чыста-правільна і не перашкаджайце працаваць! Гэта была пазіцыя – мы вывучым сітуацыю і, магчыма (ён падкрэсліў, што магчыма), будзе прыпыненае як мінімум на некалькі дзён будаўніцтва на гэтай зоне», – падзяліўся падрабязнасцямі старшыня партыі БНФ Аляксей Янукевіч.

Грамадскасць справу Курапатаў проста так не пакіне

Калі чыноўнікі стрымаюць сваё слова, кароткую перадышку актывісты збіраюцца выкарыстаць для інфармавання пра сітуацыю вакол Курапатаў ды новых зваротаў у Міністэрства культуры і… Генпракуратуру. Бо гаворка – не толькі пра абарону нацыянальнага некропалю.

«Яшчэ ў 2013-м годзе арэнда зямлі пад будаўніцтва была атрыманая, калі зямля знаходзілася ў ахоўнай зоне, што няправільна. Таксама там не было слушна аформленых папераў на будаўніцтва, збору грамадзянаў», – тлумачыць прэтэнзіі Эдуардр Пальчыс, стваральнік сайту «1863Х.сom».

Наперадзе ж Курапаты ды іх абаронцаў чакае чарговая трывожная ноч. Каб выстаяць, ім патрэбная салідарнасць і дапамога ўсіх неабыякавых беларусаў.

Валерый Руселік, «Белсат», фота: БелаПАН

Глядзі таксама
Каментары