Улады Беларусі атакуюць саюз палякаў

Генеральная пракуратура распачала крымінальную справу супраць старшыні Саюзу палякаў у Беларусі Анджэлікі Борыс ды іншых чальцоў арганізацыі. Іх абвінавачваюць у распальванні нацыянальнай варожасці. Падставаю сталі гістарычныя і культурніцкія імпрэзы, якія ладзіліся цягам апошніх трох гадоў. Чаму ўлады гадамі не рэагавалі на гэтыя падзеі?

На ціск на Саюз палякаў у Беларусі адказаць эканамічнымі ды гандлёвымі санкцыямі супраць рэжыму Аляксандра Лукашэнкі. Прэм’ер-міністр Польшчы Матэўш Маравецкі даў зразумець, што сітуацыя вакол польскае меншасці ў Беларусі не застанецца без рэакцыі.

«Мы заклікаем беларускія ўлады апамятацца. Палякі ў Беларусі абагачаюць беларускую культуру і ў той жа час клапоцяцца пра захаванне польскай культуры. Яны добрыя грамадзяне Беларусі, і яны не здзейснілі нічога дрэннага, таму мы будзем рабіць усё, каб ім дапамагчы. Палякі могуць разлічваць на падтрыманне з боку дзяржавы», – заявіў прэмʼер-міністр Польшчы Матэуш Маравецкі.

Спынення рэпрэсіяў супраць актывістаў Саюзу палякаў у Беларусі запатрабавала і Міністэрства замежных справаў Польшчы:

«Гэтыя дзеянні супярэчаць усім міжнародным забавязанням, а таксама двухбаковым дамовам, такім, як Польска-беларуская дамова аб добрасуседстве», – гаворыцца ў заяве намесніка міністра замежных справаў Польшчы Марціна Пшыдача.

23 сакавіка затрымалі старшыню Саюзу палякаў у Беларусі Анджэліку Борыс, яе пакаралі 15-дзённым арыштам. А сёння зранку міліцыянты прыйшлі дадому да журналіста і сябры рады Саюзу – Анджэя Пачобута. У доме адбыўся ператрус, Пачобута затрымалі.

«Забралі тэхніку ўсю, што была ў хаце. Нашую і тэхніку дзяцей. Тэлефоны таксама. Тэлефон поўнагадовай дачкі, тэлефон няпоўнагадовага сына. Забралі карту паляка і нейкую літаратуру на польскай мове, якая іх асабліва зацікавіла. Забралі нейкія аркушы А4, флэшкі» – распавядае жонка Анджэя Пачобута Аксана.

Акрамя таго, супрацоўнікі міліцыі прыйшлі да іншых чальцоў рады Саюзу палякаў: дырэктаркі грамадскай школы ў Ваўкавыску Марыі Цішкоўскай ды кіраўніцы лідскага аддзелу СПБ Ірэны Бярнацкай. Жанчын затрымалі ды павезлі ў Менск. У грамадскай школе і рэдакцыі пры сядзібе Саюзу палякаў у Горадні падчас ператрусаў вынялі камп’ютары, польскую літаратуру, газеты і часопісы.

«Сёння ўлады ўдарылі ў найбольш важныя кропкі: галоўную сядзібу і найбольш актыўныя аддзелы, у Ваўкавыску і Лідзе, дзе існуюць школы навучання польскай мове», – распавядае прэс-сакратар Саюзу палякаў у Беларусі Анджэй Пісальнік.

Прэсавая служба Генеральнай пракуратуры Беларусі паведаміла аб узбуджэнні супраць старшыні Саюзу палякаў у Беларусі Аджэлікі Борыс і «іншых асобаў» крымінальнае справы паводле артыкулу 130 Крымінальнага кодэксу: «Распальванне расавай, нацыянальнай, рэлігійнай ці іншай сацыяльнай варажнечы».

«Пазначаныя грамадзяне, якія пазіцыянуюць сябе як чальцы вышэйпазначанага саюзу, з 2018 года да сённяшняга часу на тэрыторыі гораду Горадні ды іншых населеных пунктаў вобласці з прыцягненнем няпоўнагадовых арганізавалі і правялі шэраг незаконных масавых мерапрыемстваў для ўшанавання ўдзельнікаў антысавецкіх бандфармаванняў, якія дзейнічалі падчас і пасля Вялікай Айчыннай вайны», – гаворыцца ў заяве Генпракуратуры.

Гэта ўжо другая крымінальная справа паводле дадзенага артыкулу. 10 сакавіка справу завялі па факце правядзення ў Польскай сацыяльнай школе скаўтаў імя Рамуальда Траўгута ў Берасці падзеі, прысвечанай вайскоўцам польскай Арміі краёвай. Тады сілавікі затрымалі дырэктара школы Ганну Панішаву, а беларускае МЗС запатрабавала ад генеральных консулаў Польшчы ў Горадні ды Берасці пакінуць краіну. Польшча адказала высыланнем беларускіх консулаў з Беластоку і Варшавы.

На думку палітолага Валера Карбалевіча, такія дзеянні ўладаў Беларусі скіраваныя, перш за ўсё, на фармаванне вобразу замежнага ворага ва ўмовах унутрыпалітычнага крызісу.

«Польшча падыходзіць на гэтую ролю. Тут можна абудзіць і гістарычныя комплексы. З тэрыторыі Польшчы вяшчае і «Белсат», тэлеграм-каналы, адзін з якіх стварыў фільм «Залатое дно», што вельмі непрыемна для ўладаў», – разважае Валер Карбалевіч.

Польшча, як і іншыя краіны Еўрапейскага Звязу, не прызнала вынікаў выбараў 2020 года. Краіна традыцыйна падтрымлівае беларускую грамадзянскую супольнасць ды тых апанентаў рэжыму, якія былі вымушаныя пакінуць Беларусь.

Алесь Баразенка, «Белсат»

 

Падпісвайся на telegram Белсату

Глядзі таксама