«Кажуць, мова мая аджывае
Век свой ціхі: ёй знікнуць пара.
Для мяне ж яна вечна жывая,
Як раса, як сляза, як зара».
«Родная мова» Пімен Панчанка
Каб мова была вечна жывая, ют’юбер у выгнанні, аўтар праекту «Жыццё-маліна» тры тыдні таму пастанавіў і ў прыватным, і ў працоўным жыцці перайсці на беларускую мову.
Глядзіце сюжэт у нашым відэа:
Я запыталася ў блогера, што менавіта яго падштурхнула змяніць мысленне з расейскай мовы на беларускую?
«Прыехаў у Вільню – і разумееш: не, мы іншыя. Прыехаў у Польшчу – ты разумееш: не, мы іншыя. Ты прыехаў у Кіеў – таксама мы іншыя. Якія мы? Вось такое пытанне, якое мы вырашаем. Беларуская мова, мне падаецца, дапамагае яго вырашаць. Яна пяшчотная, яна прыгожая, яна такая маляўнічая вельмі. І мы такія павінныя быць», – лічыць блогер Мікіта Мелказёраў.
Пяшчотная і прыгожая беларуская мова гучала ўва ўсім свеце без перапынку цягам содняў! З нагоды Дня роднай мовы адбыўся першы сусветны марафон «24 гадзіны беларускай мовы». Падчас онлайн-сустрэчаў беларусы дзяліліся сваімі ведамі на разнастайныя тэмы, ладзілі тэматычныя гульні, спявалі, чыталі вершы.
Аб’яднала беларусаў свету і агульнабеларуская дыктоўка, тэкст якой сёлета чытаў кіраўнік НАУ Павел Латушка.
А тыя, хто яшчэ не піша, у Дзень роднай мовы могуць глядзець казкі па-беларуску.
Ёсць у беларусаў і сямейныя забавы па-беларуску – цэлая «Скарбонка гульняў».
Аднаго Дня роднай мовы мала! Купалаўцы абвесцілі цэлы тыдзень, цягам якога ў адкрытым доступе можна глядзець спектаклі па-беларуску. Сёння – апошні дзень бясплатнага ўваходу ў тэатр.
Што яшчэ можна пачытаць, паглядзець ці паслухаць па-беларуску не толькі ў Дзень роднай мовы? Нашая інтэрнэт-рэдакцыя падрыхтавала велізарную падборку рэсурсаў. Штодня па-беларуску і без цэнзуры для вас працуе – незалежны беларускамоўны тэлеканал «Белсат». З Днём роднай мовы!
Вольга Старасціна, «Белсат»