2 лютага Злучаныя Штаты прыпыняць выкананне Дамовы аб ліквідацыі ракет сярэдняй і малой дальнасці. Праз паўгода ЗША могуць выйсці з гэтай дамовы канчаткова.
Аб прыпыненні Вашынгтонам выканання Дамовы аб ліквідацыі ракет сярэдняй і меншай дальнасці заявіла намеснік дзяржсакратара ЗША па кантролі за ўзбраеннямі і міжнароднай бяспекі Эндрэа Томпсан (Andrea Thompson) на брыфінгу ў штаб-кватэры NATO ў Бруселі ў сераду, 16 студзеня, перадае «Deutche Welle».
Паводле NATO, Расея парушыла дамову, стварыўшы крылатую ракету наземнага базавання 9M729 для комплексу «Іскандэр».
«Парушэнні не павінны заставацца без наступстваў. Як я сказала расейскім суразмоўцам, у Расеі ёсць выбар: або пакінуць сваю ракетную сістэму, якая парушае дамову, або захаваць дамову аб РСМД. І адно, і другое разам – немагчыма», – заявіла Томпсан.
У снежні дзяржсакратар ЗША Майк Пампэёў (Mike Pompeo) даў Расеі 60 дзён на тое, каб яна вярнулася да выканання ДРСМД. Гэты тэрмін скончыцца 2 лютага.
Сталая прадстаўніца ЗША пры NATO Кей Бэйлі Гатчысан (Kay Bailey Hutchison) удакладніла, што 2 лютага пачнецца шасцімесячны тэрмін, падчас якога яе краіна будзе заставацца бокам ДРСМД. ЗША выйдуць з дамовы толькі па яго заканчэнні.
«У Расеі ўсё яшчэ ёсць шэсць месяцаў, перш чым выхад [з Дамовы] будзе канчатковым. Гэта апошні шанец для Расеі захаваць дамову», – заявіла Гатчысан.
ЗША і СССР падпісалі ДРСМД, паводле якой адмовіліся ад балістычных ракетаў наземнага базавання сярэдняй (ад 1 тыс. да 5,5 тыс. км) і малой (ад 500 да 1 тыс. км) далёкасці.
ДД/Belsat.eu