Кіраўнік Расеі ўпэўнены, што захоп расейскімі памежнікамі трох украінскіх вайсковых караблёў – правакацыя Пятра Парашэнкі напярэдадні прэзідэнцкіх выбараў.
Пра гэта ён заявіў на пленарнай сесіі інвестфоруму «Расея кліча!».
Пуцін назваў інцыдэнт у Керчанскай пратоцы «неахайнай гульнёй унутры Украіны ў інтарэсах уціску палітычных апанентаў». Выбары ва Украіне пройдуць у сакавіку 2019 года. Паводле апытанняў Парашэнка ў прэзідэнцкай гонцы пакуль ідзе на трэцім месцы.
На думку Пуціна, украінскі лідар хоча абвастрыць сітуацыю ў краіне і стварыць «непераадольныя перашкоды» для сваіх канкурэнтаў.
Кіраўнік Крамля таксама заявіў, што кіеўскія ўлады «з поспехам прадаюць антырасейскія настроі», таму што прадаваць ім больш няма чаго.
«І ўсё сыходзіць ім з рук. Калі яны папросяць немаўлятаў на сняданак, ім і немаўлят, здаецца, пададуць», – сказаў Пуцін.
***
25 лістапада тры ўкраінскія караблі з ужываннем зброі захапіў расейскі спецназ у раёне Керчанскай пратоцы. Агулам Расея ўзяла ў палон 24 чалавекі, 6 маракоў параненыя. У адказ Парашэнка абвясціў ваеннае становішча ў некалькіх абласцях тэрмінам на адзін месяц.
ДР belsat.eu
