Праваслаўныя вернікі святкуюць Хрышчэнне Гасподняе. Журналісты «Белсату» пабачылі, як адбываецца Вадохрышча на легендарнай крыніцы пад Слаўгарадам, дзе хрысцілі радзімічаў ды на адным з улюбёных месцаў для адпачынку менчукоў – Цнянскім Вадасховішчы.
Тут хрысцілі радзімічаў
Блакітная крыніца ці Сіні калодзеж – крыніца з самым магутным патокам ва Усходняй Еўропе. Яна месціцца непадалёк Слаўгарада, у ваколіцах выселенай праз радыяцыю вёскі Кліны
Паводле легенды племя радзімічаў было ахрышчана ў гэтай крыніцы.
З даўніх часоў месца вакол крыніцы лічылася сакральным, і выкарыстоўвалася як капішча. З прыходам хрысціянства, гэта месца было асвечана, і як кажуць адно з першых на нашай зямлі, стала лічыцца святым. Вада лічыцца гаючай і валодае высокімі пітным якасцямі.
Побач з крыніцай пабудавана царква, дзе правяцца малебны 14 жніўня на праваслаўнае свята Макаўе, калі побач з Блакітнай крыніцай збіраецца да 20 тысяч паломнікаў.
На Цнянцы вернікаў ахоўваў міліцыянт
Цнянскае вадасховішча – наліўное вадасховішча на поўначы Менску, каля былой вёскі Цна-Ёдкава, было пабудаванае ў 1982 годзе. Першапачаткова прызначалася для гаспадарча-пітнога і тэхнічнага водазабеспячэння гораду. У апошні час вакол вадасховішча створана зона адпачынку.
Тут жа штогод ладзіцца і святкаванне Вадохрышча.
Будучы бязгрэшным, Ісус Хрыстос ня меў патрэбы ў хрышчэнні, як у ачышчэнні ад асабістых грахоў, аднак Сваім Хрышчэннем, як гаворыцца ў царкоўных песнапеннях, «патапіў у водах Іярдану грахі ўсяго свету» і асвяціў ваду.
19 студзеня, паводле праваслаўнае веры на рэках, сажалках і ў студнях вада становіцца святою. З даўніх часоў гэтая вада прызначаецца, у прыватнасці, для тых, хто па розных прычынах пазбаўлены таінства Прычасця.
МЛ, belsat.eu
