Рэакцыя брытанскіх уладаў на атручванне Скрыпалёў
Агенцтва Press Association паведамляе, што брытанская паліцыя змагла ўсталяваць асобы меркаваных злачынцаў, якія атруцілі двайнога агента Сяргея Скрыпаля і ягоную дачку Юлію.
Навіну пра гэта брытанскае інфармагенцтва распаўсюдзіла 19 ліпеня са спасылкай на інфармаваную крыніцу.
Праваахоўнікі кажуць пра некалькіх расейцаў, уцягнутых у спробу замаху, і шукаюць больш чым аднаго падазраванага.
«Следчыя мяркуюць, што яны выявілі падазраваных у здзяйсненні атакі з выкарыстаннем навічка дзякуючы сістэме відэаназірання, праверыўшы пры гэтым звесткі асобаў, якія ўехалі ў краіну прыкладна ў гэты час. Яны (следчыя) упэўненыя, што падазраваныя – рускія», – піша «The Guardian» са спасылкай на Press Association.
У сакавіку ў Солсберы былі атручаныя былы супрацоўнік ГРУ, брытанскі шпіён Сяргей Скрыпаль і ягоная дачка Юлія. Пасля інцыдэнту яны некалькі тыдняў былі ў коме, пазней, як заявіла брытанская паліцыя, іхны стан палепшыўся. Улады Вялікай Брытаніі абвінавацілі ў арганізацыі атручвання Расею, Крэмль гэта адмаўляе. Паводле брытанскіх уладаў, Скрыпалёў атруцілі нервова-паралітычным рэчывам «навічок». Яго распрацавалі ў СССР.
НМ, belsat.eu
