У Курапатах міліцыянты затрымалі актывіста Дзяніса Урбановіча з «Народнай грамады» – за тое, што ён зрабіў надпіс “Кабак НКВД закрыт” на плоце рэстарацыі.
У Курапатах працягваюцца пратэсты супраць адкрыцця рэстарацыі «Паедзем, паямо».
На месца пратэсту вярнуўся актывіст Дзяніс Урбановіч, якога раней затрымалі. Кажа, што ў міліцыі на яго склалі два пратаколу, пагражалі, што вывязуць за горад, калі вернецца ў Курапаты. Тут пахаваны ягоны дзед.
Каля 14-ай гадзіны прыехала актывістка і рэжысёрка Вольга Нікалайчык – са шпалерамі, на якіх будуць пісаць балончыкам надпісы і якія пасля плануюць вывесіць уздоўж дарогі.
Актывісты не прапускаюць аўты, якія спрабуюць заехаць на тэрыторыю рэстарацыі. Супрацоўнік ДАІ склаў пратакол на пенсіянерку Ніну Багінскую, якая блакавала дарогу.
Павел Севярынец распавёў Belsat.eu, што сёння плануецца абмеркаванне ідэяў Змітра Дашкевіча па абароне Курапатаў. Зміцер Дашкевіч падчас учорашняга стрыму ў «Facebook» адзначыў, што трэба 28 асобаў, каб арганізаваць штодзённую варту побач з рэстарацыяй і заклікаў далучацца арганізацыі.
У чацвер адбыліся сутычкі ўдзельнікаў пратэсту з ахоўнікамі ўстановы. Акцыя праходзіць пад лозунгам «Не кабак, а музей». Рэстарацыя месціцца ў комплексе будынкаў, які раней называўся «Бульбаш-хол». Улетку там збіраюцца адчыніць таксама лазню.
Паводле даследчыкаў, у сталінскія часы ў Курапатах ладзіліся масавыя расстрэлы, там загінула ад 30 да 250 тыс. асобаў.
Чытайце таксама:
ДК, belsat.eu. Фота – Ірына Арахоўская