Непераможная карупцыя: самыя гучныя арышты чыноўнікаў і «набліжаных»


Сёння стала вядома пра затрыманне за хабар у $ 200 тыс. памочніка кіраўніка краіны Сяргея Раўнейкі. Гэта далёка не адзіны факт карупцыі ў Беларусі: цягам апошніх месяцах не бракавала гучных арыштаў чыноўнікаў і прызначэнцаў.

Трапіўся чыноўнік з прэзідэнцкай інспекцыі

У пачатку траўня ў Камітэце дзяржбяспекі распавялі пра затрыманне высокапастаўленых чыноўнікаў Дзяржаўнай інспекцыі аховы жывёльнага і расліннага свету пры прэзідэнце Беларусі.

Вось што распавялі тады ў КДБ:

«Па сутнасці, функцыянавала шматузроўневая сістэма атрымання ўзнагароджання ў выглядзе здабытых браканьерскім спосабам аб’ектаў жывёльнага свету. Асобам, якія ўдзельнічалі ў браканьерскай дзейнасці, супрацоўнікі інспекцыі аказвалі заступніцтва, перадавалі інфармацыю аб планаваных рэйдах, паведамленнях грамадзянаў аб фактах парушэння браканьерамі прыродаахоўнага заканадаўства, вярталі канфіскаваныя браканьерскія прылады лоўлі (сеткі, пасткі і г.д.)».

У выніку затрымалі начальніка Віцебскай абласной інспекцыі Васіля Лемешава, начальніка Мазырскай міжраённай інспекцыі Уладзіміра Лагімахава і ягонага намесніка Аляксандра Красюка. Таксама ў справе фігуруюць 6 кіраўнікоў міжраённых інспекцыяў Віцебскай вобласці.

«Гарачы каментар» пра карупцыю

Справа супраць адказнага за спажывецкі рынак Менску

10 траўня Следчы камітэт паведаміў пра затрыманне былога начальніка Галоўнага ўпраўлення спажывецкага рынку Менгарвыканкаму Андрэя Дамарацкага – за злоўжыванне службовымі паўнамоцтвамі. СК мяркуе, што чыноўнік нанёс істотную шкоду дзяржаўным інтарэсам.

Паказальна, што папярэдніка Дамарацкага – Сяргея Барысевіча – таксама затрымалі, па падазрэнні ў карупцыі.

Чарговае затрыманне ва ўпраўленні юстыцыі Гомельшчыны

У пачатку сакавіка навіны пра карупцыю прыйшлі з Гомлю. Там затрымалі двух высокіх чыноўнікаў – з упраўлення прымусовага выканання Галоўнага ўпраўлення юстыцыі Гомельскага аблвыканкаму. Іх падазраюць ва злоўжыванні службовымі паўнамоцтвамі. Чыноўнікам пагражае да 12 гадоў зняволення з канфіскацыяй маёмасці.

Летась суд Цэнтральнага раёну Гомлю разглядаў крымінальную справу ў адносінах экс-начальніка ўпраўлення прымусовага пакарання галоўнага ўпраўлення юстыцыі Гомельскага аблвыканкаму. Яе пакаралі 3 гадамі пазбаўлення волі.

І гэта не ўсе навіны з Гомлю

У красавіку кіраўнік МУС Ігар Шуневіч распавёў пра затрыманне былога старшыні Гомельскага райвыканкаму Аляксандра Сітніцы.

Пачалося з таго, што Аляксандр Сітніца «знік» – перастаў выходзіць на працу. Сілавыя структуры гэтую інфармацыю не каментавалі. Толькі прэс-служба Гомельскага аблвыканкаму паведаміла аб звальненні Сітніцы «за прагулы».

Чыноўнік быў абвешчаны ў вышук і, як сцвярджаюць крыніцы TUT.BY, яго затрымалі ў Расеі. Афіцыйна пацвердзіць звесткі аб затрыманні менавіта ў Расеі не атрымалася.



Карупцыя «з’ядае» бюджэтныя грошы

Аляксандр Сітніца ўзначальваў Гомельскі райвыканкам з 2009 года.

Дырэктар Палацу спорту браў грошы амаль штодня

Можна яшчэ ўзгадаць пра затрыманне дырэктара менскага Палацу спорту Сяргея Прановіча. Ён, праўда, браў хабары не па $ 200 тыс., як памочнік Лукашэнкі, толькі $ 100-1200. Але як сцвярджаюць у КДБ, грошы яму паступалі амаль штодня. І так з 2014 года… Сяргей Прановіч браў грошы за прадастаўленне плошчаў палацу пад выставы.

НМ, belsat.eu

Стужка навінаў