Паліцыя затрымала дэпутата Нацыянальнага сходу Армэніі, які ўзначаліў пратэст.
Апазіцыянер Нікол Пашыньян, які стаў на чале пратэставага руху супраць абрання Сэржа Саргсьяна прэм’ерам краіны, быў затрыманы на вуліцы Арцаха ў Ерэване падчас шэсця.
Паліцыя ўжыла шумавыя гранаты для стрымлівання дэманстрантаў.
А пасля пачала разганяць акцыю пратэсту і затрымліваць яе ўдзельнікаў з ужываннем сілы.
Паліцыянты затрымалі таксама апазіцыйных дэпутатаў Сасуна Мікаэляна і Арарата Мірзаяна.
Паводле афіцыйных звестак, армянскія праваахоўнікі затрымалі 192 асобы.
Саргсьян адмовіўся абмяркоўваць сваю адстаўку
Сёння раніцай ў ерэванскай гасцініцы «Арменія Мар’ёт» у прысутнасці журналістаў павінныя былі адбыцца перамовы паміж новаабраным прэм’ерам і лідарам пратэсту. Праз тры хвіліны пасля іх пачатку Саргсьян сказаў, што гэта не перамовы.
«Гэта не дыялог: а ультыматум, шантаж дзяржавы і а законных уладаў», – заявіў Саргсьян.
Запіс гэтага спаткання апублікавала «Настоящее время».
Сэрж Саргсьян быў прэзідэнтам Арменіі з 2008 года. Сёлета скончыўся ягоны другі, апошні, тэрмін. У аўторак парламент абраў Саргсьяна прэм’ерам.
Згодна са зменамі ў Канстытуцыі, якія былі прынятыя пасля рэферэндуму ў 2015 годзе, цяпер прэм’ер-міністр мае вялікую ўладу ў Арменіі, пасада прэзідэнта стала ў значнай ступені цырыманіяльнай.
Пратэсты ў Арменіі цягнуцца з канца мінулага тыдня.
ДД
