Міністэрства замежных спраў Украіны не атрымала ад беларускага боку афіцыйнай інфармацыі пра абставіны затрымання ўкраінца Паўла Грыба на тэрыторыі Беларусі.
«Таму амбасада Украіны ў Беларусі напрыканцы верасня паўторна звярнулася з нотай да МЗС Беларусі па справе аб прадастаўленні інфармацыі пра абставіны магчымага затрымання Паўла Грыба на тэрыторыі Беларусі», – паведаміў прадстаўнік дэпартамента консульскай службы МЗС Украіны Васіль Кірыліч на прэс-канферэнцыі ў Кіеве.
Напрыканцы жніўня бацька Паўла Грыба, былы супрацоўнік памежнай службы Украіны Ігар Грыб паведамляў, што яго сын знік 24 жніўня, паехаўшы на сустрэчу з дзяўчынай у Гомель. Ігар Грыб заявіў, што яго сына ў Беларусі выкралі супрацоўнікі ФСБ пры дапамозе гэтай дзяўчыны.
Беларускі бок факт перасячэння Грыбам мяжы пацвердзіў і дадаў што ніякіх прэтэнзіяў да яго не ўзнікла, але звесткі пра выкраданне хлопца ў Гомлі ніяк не пракаментаваў. Пазней суд Краснадара паведаміў, што пастанова аб арышце Паўла Грыба была вынесена 17 кастрычніка (то бок да таго, як адбылося перасячэнне беларускай мяжы), ен быў у міжнародным вышуку паводле абвінавачвання ў тэрарызме. Цяпер 19-гадовы ўкраінец знаходзіцца ў краснадарскім СІЗА.
У сераду Кастрычніцкі раённы суд Краснадара падоўжыў арышт выкрадзенаму ў Беларусі ўкраінцу Паўлу Грыбу да 4 студзеня 2018 года.
Павел Грыб пакутуе на хранічныя захворванні. Медыкі лічаць, што стан здароўя Паўла Грыба ў цяперашні момант можна лічыць цяжкім.
«Гэта не ажыятаж вакол тэмы здароўя. У гэтага чалавека сапраўды цяжкі стан здароўя. Яму ў любы момант можа стаць вельмі дрэнна», – заявіў учора прафесар Васіль Прытула.
ІІ, belsat.eu