[/vc_column_text][vc_single_image image=”384050″ img_size=”large”][vc_column_text]Апошнія гады расейскія медыі перыядычна рабілі выпады ў бок Беларусі. 25 кастрычніка антыбеларуская прапаганда выйшла на новы ўзровень, піша nn.by.
Расейскае інфармагенцтва regnum.ru апублікавала матэрыял, у якім Беларусь называецца «зварʼяцелаю недадзяржаваю», а нацыю – «выдуманаю».
- Lenta.ru: «У Беларусі актывізаваліся добраахвотніцкія абʼяднанні нацыяналістаў»
- «Regnum»: Для беларускага «майдана» ўжо гатовыя 15 «соцен»
Асабліва разʼюшыла аўтарку ініцыятыва некаторых дзіцячых садкоў зрабіць чацвер днём беларускай мовы.
«Беларускія русафобы, дапушчаныя дзяржавай да высокіх пасадаў, прыдумалі новы спосаб забруджвання мазгоў падрастаючаму пакаленню беларускім дыялектам рускай мовы, – піша Ала Бронь (псеўданім). – Цяпер у дзіцячых садках замест «рыбнага дня» у чацвер будзе дзень беларускай мовы. Такім чынам, беларуская дзяржава разлічвае паступова пераадолець іррэдэнтысцкія настроі беларусаў, абсалютная большасць якіх жадае ўзʼяднання са сваёй вялікай Радзімай – Расеяй».
Далей ідзе сцвярджэнне, што беларускую мову выдумалі трацкісты, а асобныя гаворкі ў рэгіёнах на асобную мову не цягнуць.
Беларуская нацыя, маўляў, таксама прыдуманая, але палякамі.
«Калі праз некалькі дзесяцігоддзяў многія еўрапейскія мовы перастануць існаваць, то што казаць пра новаствораную?», – піша аўтар/ка, выкарыстоўваючы тыповы прыём прапаганды, калі сцвярджэнне немагчыма праверыць.
Пры гэтым беларуская мова называецца патрэбнай толькі «зварʼяцелай недадзяржаве» – Беларусі.
«Усё, чаго дамогуцца беларусізатары – сапсуюць вашаму дзіцяці маўленне. Яно будзе гаварыць з акцэнтам і блытаць рускія словы з беларускімі. Калі гэта здарыцца з ім у досыць раннім узросце, магчыма, гэта ўжо нельга будзе выправіць. Скажу пад сакрэтам, што няўменне правільна гаварыць на літаратурнай мове ва ўсім свеце лічыцца прыкметай нізкага паходжання і зʼяўляецца тормазам сацыяльнага росту. Калі вам неабыякава будучыня вашых дзяцей – не дазваляйце палітыкам ставіць над імі эксперыменты. Магчыма, заўтра Лукашэнка вычысціць беларусізатараў з дзяржапарату і пабяжыць на паклон у Маскву, а гаворка ў вашага дзіцяці ўжо будзе сапсавана назаўжды», – так сканчаецца антыбеларускі матэрыял расейскіх прапагандыстаў.
Раней Ала Бронь напісала артыкулы з наступнымі загалоўкамі: «Беларусь олигархическая: где лежат 30 долларов Владимира Макея», «К какой «гибридной войне» и с кем готовятся в Белоруссии» і «”Фабрика мозга” готовит Белоруссию к войне против России».
ЮВ, belsat.eu, паводле nn.by[vc_row][vc_column][/vc_column][/vc_row]
