Камітэт салідарнасці заклікае прыцягнуць вядомых беларусаў да вызвалення Эдуарда Пальчыса
БХД будзе дамагацца, каб арыштаванага аўтара сайту 1863x.com прызналі палітычным вязнем.
Такія вынікі першага паседжання грамадскага камітэту «Свабоду Эдуарду Пальчысу», якое адбылося 13 чэрвеня ў Менску ў офісе Партыі БНФ. Камітэт прыняў шэраг рашэнняў па правядзенню кампаніі салідарнасці з блогерам.
Паводле Паўла Севярынца, калі стваральніка 1863x.com прызнаюць палітвязнем, ёсць вялікая імавернасць, што яго выпусцяць да парламенцкіх выбараў.
«Паступіла інфармацыя, што пасля нашай акцыі салідарнасці Пальчыса перавялі ў Жодзіна. Гэта вельмі дрэннае месца», – сказаў Севярынец.
Севярынец прапанаваў правесці грамадскую экспертызу 21 чэрвеня – гісторыкі і лінгвісты азнаёмяцца са зместам сайта Пальчыса і зробяць заключэнне пра правамернасць абвінавачванняў у ягоны адрас.
Адным з крокаў таксама мае стаць паручніцтва знакамітых беларусаў.
«Мы павінны звярнуцца да Святланы Алексіевіч, Уладзіміра Арлова, Змітра Вайцюшкевіча ды іншых», – сказаў Севярынец.
Зміцер Дашкевіч прапанаваў правесці акцыю ля Галоўпаштамта.
«Яго артыкуламі захапляліся тысячы беларусаў, а на акцыю салідарнасці прыйшлі сямёра. Мы павінны без асацыяцыі з палітычнымі рухамі правесці акцыю: каб мінакі падпісвалі паштоўкі Пальчыса, якія мы адправім у Жодзіна», – сказаў ён.
На сайце 1863х.com публікаваліся матэрыялы з крытыкай беларускіх і расейскіх уладаў. У лістападзе 2015 года ён паведаміў пра затрыманне КДБ і прымусовае знаходжанне ў псіхічным шпіталі. Пасля гэтага ён пераехаў ва Украіну. У студзені 2016 года яго арыштавалі ў Расеі, а на пачатку чэрвеня экстрадавалі ў Беларусь.
9 чэрвеня пад сценамі СІЗА № 1 на вуліцы Валадарскага адбыўся пікет салідарнасці з Эдуардам Пальчысам.
11 чэрвеня яго перавялі з СІЗА ў жодзінскую турму. Хлопцу пагражае да 5 гадоў турмы за распальванне нацыянальнай варожасці.
