Спецпрадстаўнік Пуціна і амбасадар Расеі ў Беларусі Міхаіл Бабіч лічыць, што ўсе размовы пра пагрозу суверэнітэту Беларусі могуць быць выбарчай тэхналогіяй пад назвай «мабілізацыя электарату шляхам фармавання вобразу ворага«. Але нават у такім выпадку, лічыць пасол, наўрад ці разумна такую тэхналогію рэалізоўваць за кошт стасункаў з бліжэйшым саюзнікам і брацкім народам.
Пра гэта Міхаіл Бабіч заявіў у інтэрв’ю РИА «Новости».
«Па пытанні аб абароне суверэнітэту: усім, мне здаецца, даўно хацелася б зразумець, хто робіць замах на беларускі суверэнітэт і ад каго яго хочуць абараніць? Калі гэта пагроза з Захаду, па аналогіі з вядомымі «каляровымі» рэвалюцыямі і дзяржаўнымі пераваротамі, то Расейская Федэрацыя як саюзнік, калі паступіць такая просьба, будзе разам з Беларуссю адстойваць гэты суверэнітэт усімі даступнымі сродкамі», – сказаў Бабіч.
Ён дадаў, што «калі гэта намёкі на Расею, то гэта зусім не па-партнёрску».
«Расея такога стаўлення не заслужыла», – падкрэсліў дыпламат.
Раней Міхаіл Бабіч ужо заяўляў, што «любы напад на Беларусь Масква будзе лічыць нападам на Расею з усімі вынікаючымі з гэтага наступствамі».
СК belsat.eu