Жыхары віленскага мікрараёну Наўяміесціс скардзяцца на пахі з кітайскай амбасады. На тэрыторыі амбасады ёсць печ, у якой, з усяго відаць, паляць не толькі паперу, але і розныя адкіды, паведамляе «Delfi».
Выданне адзначае, што пасля таго, як у канцы 2021 года ў Літве адкрылі прадстаўніцтва Тайваню, раззлаваная КНР змяніла ўзровень сваёй прысутнасці ў Літве – перавяла амбасаду ў офіс часовага паверанага ў справах Кітаю.
Пры гэтым жыхары суседніх дамоў яшчэ з 2016 года перыядычна скардзяцца на пахі з тэрыторыі дыпламатычнага прадстаўніцтва. Адная жанчына падзялілася відэа, на якім працаўнік амбасады ў масцы кідае паперу ў печ. Сярод падрыхтаванага для спальвання смецця на відэа ёсць і скрынка з дротам, пластыкам.
,,«Немагчымы смурод – дзеці на вуліцы, яны скардзяцца, што баліць галава, трэба нешта рабіць», – пісала яна.
Людзі пісалі, што звярталіся ў розныя службы, але ніхто не можа дапамагчы, бо тэрыторыя амбасады недатыкальная: «За плотам – не літоўская дзяржава».
Пасля скаргаў МЗС Літвы «нагадаў працаўнікам кітайскай амбасады пра тое, што варта прытрымлівацца дзейных у Літве законаў і не паліць таксічных адкідаў, што забруджваюць паветра ды навакольнае асяроддзе».
Нагадаем, што дзяржаўная прапаганда Беларусі нечакана выпусціла сюжэт, прысвечаны працы нямецкіх дыпламатаў у краіне. З сачэннем, камерамі, абвінавачваннямі ды іншымі выпадкамі «не да законаў». Беларусам і Беларусі ад такіх паводзінаў уладаў лепш не стане, а вось Расея ў такім развіцці зацікаўленая.
Якуб Хруст belsat.eu
