У ноч на нядзелю Ізраіль і Іран абмяняліся ракетнымі ўдарамі. Габрэйская дзяржава атакавала энергетычную і вайсковую інфраструктуру, ісламская – нафтазавод і жылыя дамы. Паводле ізраільскіх медыяў, загінулі 10 асобаў, 200 былі параненыя. Іран пра ахвяраў не паведамляе.
Ізраіль атакаваў штаб-кватэру Міністэрства абароны Ірану, сховішчы з палівам, нафтазавод у Тэгеране, два газавыя аб'екты на поўдні ісламскай рэспублікі. Іранскае агенцтва IRNA перадае, што абстрэл энергетычнай інфраструктуры «вывеў вайну на новы ўзровень».
Пра загінулых і пацярпелых пасля апошніх удараў Цагалю ў Іране не паведамляюць.
Іранскія вайскоўцы атакавалі Ізраіль беспілотнікамі і ракетамі. У Telegram-каналах распаўсюджваецца інфармацыя, што была ўжытая і гіпергукавая ракета, аднак у Арміі абароны Ізраілю сумняюцца, што ісламская краіна мае такую зброю.
Абстрэл зазналі Іерусалім, Тэль-Авіў, Бат-Ям, Рамат-Ган, Рышон, Рэхавот. Як піша «The Times of Israel», у выніку ўдараў загінулі 10 асобаў, 200 атрымалі раненні.
Найбольш ахвяраў – у Бат-Яме. Там трывае ратавальная аперацыя на месцы разбуранага жылога дому, пад абломкамі могуць быць 18 асобаў. У горадзе пашкоджаныя больш за 60 будынкаў.
Тым часам CNN са спасылкаю на неназваных амерыканскіх і ізраільскіх чыноўнікаў паведамляе, што вайсковая аперацыя габрэйскай дзяржавы можа прадоўжыцца тыдні, і працягласць баявых дзеянняў залежыць ад рэакцыі Ірану. Крыніцы таксама сцвярджаюць, што ў Белым доме ведаюць пра планы Ізраілю і падтрымоўваюць іх, хоць услых пра гэта і не кажуць.
Сцяпан Кубік belsat.eu
