Ніна Багінская скіравала ў Менскую гарадскую судовую калегію сваю нязгоду з пастановаю суда. Пра гэта «Белсату» паведамілі яго крыніцы.
Нагадаем: 30 красавіка ў судзе Першамайскага раёну Менску ў закрытым паседжанні суддзя Максім Трусевіч разгледзеў крымінальную справу супраць актывісткі Ніны Багінскай паводле часткі 2 артыкулу 342 Крымінальнага кодэксу Беларусі («Неаднаразовае парушэнне закону аб правядзенні масавых мерапрыемстваў»). У аснову абвінавачання паклалі адміністратыўныя пратаколы і судовыя пастановы за 2024 год. Усе яны датычыліся выкарыстання нацыянальнай сімволікі, адзін пратакол быў складзены за майку з надпісам: «Не вайне!». Сілавікі палічылі гэта лозунгам экстрэмісцкага зместу. Суддзя вызваліў Багінскую ад пакарання паводле крымінальнага артыкулу, але прызначыў ёй прэвентыўны нагляд.
11 чэрвеня Ніна Багінская атрымала праз пошту пастанову суда. Згодна з дакументам, усё, што міліцыянеры забіралі пры затрыманні ў актывісткі, павінна быць знішчана. Ніна Багінская ў сваёй заяве патрабуе вярнуць ёй значкі і сцяжкі, якія яна зрабіла сваймі рукамі. Пагатоў міліцыянты забіралі іх у яе без афармлення. Яна неаднаразова падавала скаргі на іхныя дзеі ў вышэйшыя інстанцыі, але ёй нічога не вярнулі.
Ніна Багінская ўказала, што нацыянальныя сімвалы ёсць гістарычнай каштоўнасцю, а ў дадзеным выпадку яшчэ і ейнай творчай уласнасцю.
У выпадку, калі калегія гарадскога суда скасуе пастанову раённай, будзе прызначаны новы разгляд справы.
Любоў Лунёва belsat.eu
