Улады патлумачылі, чаму сілавікі прыходзілі ў агенцтвы нерухомасці: правяранні выявілі сур’ёзныя парушэнні. Таму ўсё працягнецца.
У Беларусі працягваюцца правяранні кампаніяў, што аказваюць рыелтарскія паслугі. Намеснік міністра падаткаў і збораў Уладзімір Муквіч на прэс-канферэнцыі 12 чэрвеня растлумачыў, што візіты сілавікоў і падаткавікоў у офісы агенцтваў нерухомасці былі звязаныя з выяўленнем сістэматычных парушэнняў, паведамляе «Зеркало».
З ягоных словаў, у хадзе супольных правяранняў працаўнікі сілавых структураў і Міністэрства падаткаў і збораў выявілі, што многія рыелтарскія кампаніі хавалі частку даходаў і не адлюстроўвалі ўсёй выручкі ад сваіх паслуг.
«Былі выяўленыя сур’ёзныя, сістэматычныя парушэнні з боку асобных кампаніяў. Некаторыя фірмы пайшлі на добраахвотнае ўрэгуляванне», – заявіў Муквіч. Відаць, у гэтым выпадку ідзецца пра пагашэнне недаплачаных збораў.
Намеснік міністра дадаў, што правяранні будуць працягвацца. Ужо цяпер плануецца прызначэнне новых – «два правяранні на падыходзе, будзем прызначаць далей».
Нагадаем, што ў пачатку красавіка ў краіне прайшоў рэйд па агенцтвах нерухомасці. Сілавікі прыходзілі без папярэджання, клалі ўсіх працаўнікоў тварам на падлогу, забіралі тэхніку і дакументы, арыштоўвалі кіраўнікоў.
Паводле эксперткі ў сферы нерухомасці Наталлі Літоўскай, прычынаю ператрусаў магло стаць тое, што пасля вывучэння гадавых справаздачаў сілавікі прыйшлі да тых, «каго падазраюць ва ўхіленні ад падаткаў, атрыманні грошай «міма касы» і выплаце заробкаў у канвертах».
Раман Шавель belsat.eu
