У палацавай сядзібе Умястоўскіх у Жамыслаўлі з’явіліся ўласныя прыгожыя сувеніры – ад футболак і шопэраў да магнітаў і нататнікаў.
Купіць усё гэта можна на месцы, каля ўваходу ў палац, ці пры жаданні замовіць з даставай у Менск.
Цэны – ад 5 рублёў за паштоўку ці асадку да 30 рублёў за керамічную бутэльку. Дызайн распрацавала ілюстратарка Людміла Каюкова, піша Hrodna.life са спасылкаю на акаўнт самой сядзібы ў Instagram.
Сядзіба працуе для наведвальнікаў штодня з 9:00 да 18:00. Уваход каштуе 5 рублёў, дзеці да 12 гадоў могуць прайсці бясплатна. Тут можна замовіць экскурсію, паездзіць на катары, павудзіць рыбу, зладзіць сямейны пікнік або нават карпаратыў. На тэрыторыі праводзяцца фальклорныя вечарыны і гістарычныя імпрэзы.
Жамыслаўль часта называюць Беларускай Венецыяй – палац стаіць на беразе возера, а паўстаў ён у XIX стагоддзі як рэзідэнцыя роду Умястоўскіх, натхнёная варшаўскімі Лазенкамі. Падчас Першай сусветнай вайны тут быў санаторый, у міжваенны час будынак быў маёмасцю Віленскага ўніверсітэту, пасля Другой сусветнай вайны ў ім размяшчаліся розныя сельскія ўстановы. У 2000-ых сядзіба прыйшла ў заняпад, была разрабаваная і гарэла. Затым яе набыў менскі прадпрымальнік Міхаіл Глінскі, які цяпер аднаўляе гэты ўнікальны архітэктурны ансамбль.
Раман Шавель belsat.eu
