Кіраўнік фонду салідарнасці «BYSOL» Андрэй Стрыжак адзначыў рост затрыманняў у справе былога маніторынгавага праекту «Беларускі Гаюн», які адсочваў перасоўванне расейскіх войскаў у Беларусі.
Такую ўвагу да гэтай катэгорыі Андрэй Стрыжак патлумачыў рыхтаваннем «пуцінска-лукашысцкага агрэсіўнага плану вайны супраць NATO, такія арышты – абсалютна натуральны спосаб зачысткі бліжняга тылу, якім стане тэрыторыя нашай краіны пасля пачатку баявых дзеянняў».
,,«Бо кожны, хто перадае дадзеныя пра перамяшчэння войскаў, – гэта ўдзельнік Руху Супраціву, які на момант пачатку баявых дзеянняў можа прымаць удзел у ім у самым розным фармаце», – адзначыў ён.
Паводле Стрыжака, такая зачыстка адрозніваецца ад зачысткі грамадскага поля, але носіць падобны характар – «знішчыць і ліквідаваць усё непадкантрольнае і патэнцыйна небяспечнае для рэалізацыі планаў саюзу дыктатур».
Пра тое, што сілавікі атрымалі доступ да базы кантактаў «Беларускага Гаюна», сталася вядома 5 лютага 2025 года. 7 лютага праект абвясціў спыненне сваёй працы. Тых, каго падазраюць у супрацы з маніторынгавым праектам, затрымліваюць паводле крымінальных справаў у межах арт. 361-4 КК РБ («Спрыянне экстрэмісцкай дзейнасці») і адпраўляюць у СІЗА. Большасць затрыманых – мужчыны.
Якуб Хруст belsat.eu
