Нацыянальны авіяперавознік прэзентаваў новы борт у сваім флоце – «Airbus A330-200». «Белавія», што застаецца пад санкцыямі, змаўчала, дзе ўзяла гэты самалёт і як плануе яго абслугоўваць. «Белсат» спытаў эксперта ў авіяцыйнай галіне, ці будуць палёты бяспечныя.
«Белавія» пахвалілася, што з набыццём «Airbus A330-200» настала новая эра»: кампанія атрымала магчымасць выконваць далёкамагістральныя рэйсы, напрыклад, на курорты Паўднёва-Усходняй Азіі. Гэтыя лайнеры здольныя пераадольваць без дазапраўкі 12 тысяч кіламетраў, а «Boeing», якія мае перавознік, – удвая меней.
У авіякампаніі запэўніваюць, што «шмат рыхтаваліся» перад тым, як пачаць эксплуатацыю: пілоты, тэхнікі і бортправаднікі прайшлі навучанне, прычым не толькі ў Беларусі, але і за мяжою, наладзілі «новыя працэсы тэхнічнага абслугоўвання новых самалётаў». А кіраўнік «Белавіі» Ігар Чаргінец сцвярджае, што «бяспека палётаў – безумоўны прыярытэт». Аднак ці магчыма гэта ва ўмовах санкцыяў?
Беларускі перавознік зазнаў некалькі пакетаў абмежаванняў: і за прымусовую пасадку ў Менску самалёта «Ryanair», і за арганізацыю нерэгулярнай міграцыі, і за суўдзел у расейскай агрэсіі супраць Украіны. Цяпер «Белавія» не мае магчымасці легальна купляць ані «Airbus», ані «Boeing», браць судны ў лізінг, набываць запчасткі і замаўляць абслугоўванне ў вытворцаў.
Нацыянальная авіякампанія не паведаміла, што тры «Airbus A330» купіла ў малавядомай прыватнай фірмы «Magic Air» з Гамбіі, што гэтым самалётам больш за 20 гадоў і «навучанне персаналу за мяжою» адбывалася, падобна, у Расеі, а не ў Францыі, дзе вырабляюцца лайнеры.
Самалёты «Airbus» прыбылі ў Менск амаль год таму, у леташнім жніўні. Крыніцы агенцтва «Reuters» раней казалі, што судны ў кепскім тэхнічным стане і іх эксплуатацыю плануюць пачаць у сакавіку. У выніку паспелі толькі да чэрвеня, і тое – падрыхтавалі толькі адзін борт.
Міністр транспарту і камунікацыяў Аляксей Ляхновіч у дзяржаўным тэлеэфіры паведаміў, што астатнія два «Airbus'ы» будуць гатовыя да палётаў да верасня.
«Гэтыя тры самалёты не ў ідэальным стане былі адразу, у іх укладаліся, прычым вельмі сур'ёзна. Недарма за год здолелі падрыхтаваць да канца толькі адзін. Такім чынам, фактычна яны ўжо абслугоўваюцца», – кажа «Белсату» эксперт у авіяцыйнай галіне, які пагадзіўся на каментар на ўмовах ананімнасці.
Адмысловец упэўнены, што «Белавія» заўсёды зможа купіць неабходныя запчасткі, нягледзячы на санкцыі. Гэтак жа, як прыдбала самыя самалёты:
,,«Будуць абслугоўвацца гэтак жа, як, напрыклад, і «Boeing»: не наўпрост, а праз фірмы-пракладкі будуць ісці дэталі. Няхай гэта не так зручна, бо даражэй і тэрміны паставак могуць істотна зацягвацца, але ж лепей так, чымся аніяк».
Наш суразмоўца адзначае, што ў пытанні бяспекі палётаў пераймацца не варта:
,,«У „Белавіі“ вельмі крапатліва да гэтага ставяцца. Пісалі, што самалёты паляцяць ужо ў сакавіку, аднак першы палёт адбыўся толькі 6 чэрвеня. Усё 100500 разоў спраўдзяць дасканала перад тым, як узняць яго ў неба. Да таго ж пад бокам ёсць Расея, дзе гэтак жа абслугоўваюцца Airbus, да яе можна заўсёды звярнуцца па дапамогу, калі што якое».
У доказ таго, што заходнія самалёты даглядаюць у Беларусі як мае быць, эксперт згадаў авіяпарк Аляксандра Лукашэнкі: маўляў, усё добра.
«Узяць той жа самалётны парк Лукашэнкі. Усе лайнеры пад санкцыямі ўжо колькі, аднак ён жа лятае імі. Можна ўявіць, якія на гэтым узроўні патрабаванні бяспекі. Так што ўсё нармальна там абслугоўваецца. І «Белавія» не вынятак», – падсумаваў адмысловец.
Пра тое, што работнікі «Белавіі» навучаліся абыходзіцца з «Airbus'ам» менавіта ў Расеі, раней даведаўся праект «Бюро Медыя». Журналіст-расследавальнік выдання Алесь Ярашэвіч таксама мяркуе, што з запчасткамі асаблівых праблемаў не будзе.
«Гэтак жа, як яны прыгналі самалёты, яны змогуць вазіць і запчасткі ў абыход санкцыяў. Ёсць процьма пасярэднікаў у розных краінах, у тым ліку ў Турцыі, якія адмыслова выкарыстоўваюцца для таго, каб прывозіць падсанкцыйную прадукцыю. Думаю, гэта горш, як лятаць на арыгінальных запчастках альбо карыстацца арыгінальнымі паслугамі еўрапейскіх вытворцаў», – сказаў ён у эфіры «Студыі «Белсат».
Паводле Ярашэвіча, у абслугоўванні «Airbus'аў» беларускі перавознік можа разлічваць толькі на Расею, якая самая пад заходнімі санкцыямі:
«Вядома ж, класна было б, калі французскія адмыслоўцы, якія робяць гэтыя «Airbus'ы», прыязджалі і вучылі гэтаму адмыслоўцаў «Белавіі», але гэта немагчыма. Аднак на дапамогу прыходзяць сябры Лукашэнкі з Расеі, бо «Аэрафлот» даўно карыстаецца «Airbus'амі». Бортправаднікі і пілоты навучаліся ў Расеі менавіта».
Сцяпан Кубік, Віталь Бабін belsat.eu
